gardish-e-sayyargan ka pesh-o-pas khulta nahin

gardish-e-sayyārgāñ kā pesh-o-pas khultā nahīñ

ye mire atrāf meñ phailā qafas khultā nahīñ

āb-o-ātish aur ḳhāk-o-bād haiñ merā vujūd

aur 'anāsir par kahāñ chaltā hai bas khultā nahīñ

ḳhvāb-o-ḳhvāhish ke 'alāva maiñ use kyā naam duuñ

jo mire ehsās ko kartā hai mas khultā nahīñ

dhuup chhāoñ chakhte chakhte zā.iqa jaatā rahā

zindagī zahr-e-halāhil hai ki ras khultā nahīñ

ik tasalsul hai masāfat kā rag-o-pai meñ ravāñ

mere paaoñ se bañdhā shor-e-jaras khultā nahīñ

sail-e-nādīda kī zad meñ haiñ mire māh-o-nujūm

kis taraf ko haiñ ravāñ ye ḳhār-o-ḳhas khultā nahīñ

mere roz-o-shab nahīñ 'at.har' kisī tartīb meñ

ab kisī abjad se bāb-e-dastaras khultā nahīñ

gardish-e-sayyargan ka pesh-o-pas khulta nahin

ye mere atraf mein phaila qafas khulta nahin

aab-o-atish aur KHak-o-baad hain mera wujud

aur 'anasir par kahan chalta hai bas khulta nahin

KHwab-o-KHwahish ke 'alawa main use kya nam dun

jo mere ehsas ko karta hai mas khulta nahin

dhup chhaon chakhte chakhte zaiqa jata raha

zindagi zahr-e-halahil hai ki ras khulta nahin

ek tasalsul hai masafat ka rag-o-pai mein rawan

mere paon se bandha shor-e-jaras khulta nahin

sail-e-nadida ki zad mein hain mere mah-o-nujum

kis taraf ko hain rawan ye KHar-o-KHas khulta nahin

mere roz-o-shab nahin 'athar' kisi tartib mein

ab kisi abjad se bab-e-dastaras khulta nahin