garmi-e-ishq ke baghair lutf-e-hayat raegan

garmi-e-ishq ke baġhair lutf-e-hayāt rā.egāñ

ishq hai zindagī kā ruup ishq se zindagī javāñ

haa.e vo chand sā.ateñ guzrīñ jo tere qurb meñ

rashk se dekhtī rahī jin ko hayāt-e-jāvedāñ

uf-rī manāzil-e-buland tere harīm-e-nāz kī

pā-e-talab ko kitne tai karne paḌe haiñ āsmāñ

barq kī dastaras se duur asr-e-nau ke ai tuyūr

aur buland āshiyāñ aur buland āshiyāñ

garm husūl jū-e-shīr haañ yūñhī mard-e-tesha-gīr

tesha-zanī hai dahr meñ asl hayāt-e-kāmrāñ

mohtasib-e-sharāb to bazm-e-jahāñ meñ haiñ bahut

ye bhī kaho ki hai koī mohtasib-e-ġham-e-nihāñ

jazba-e-himmat ai 'nihāl' jab ho mirā sharīk-e-hāl

mere laboñ pe aa.e kyuuñ shikva-e-gardish-e-zamāñ

garmi-e-ishq ke baghair lutf-e-hayat raegan

ishq hai zindagi ka rup ishq se zindagi jawan

hae wo chand saaten guzrin jo tere qurb mein

rashk se dekhti rahi jin ko hayat-e-jawedan

uf-ri manazil-e-buland tere harim-e-naz ki

pa-e-talab ko kitne tai karne paDe hain aasman

barq ki dastaras se dur asr-e-nau ke ai tuyur

aur buland aashiyan aur buland aashiyan

garm husul ju-e-shir han yunhi mard-e-tesha-gir

tesha-zani hai dahr mein asl hayat-e-kaamran

mohtasib-e-sharab to bazm-e-jahan mein hain bahut

ye bhi kaho ki hai koi mohtasib-e-gham-e-nihan

jazba-e-himmat ai 'nihaal' jab ho mera sharik-e-haal

mere labon pe aae kyun shikwa-e-gardish-e-zaman