ghazal ghazal wahi chehra dikhai deta hai

ġhazal ġhazal vahī chehra dikhā.ī detā hai

suḳhan suḳhan vahī goyā dikhā.ī detā hai

qabā-e-surḳh meñ kyā hai ki dekhte rahiye

vo har libās meñ achchhā dikhā.ī detā hai

bahut qarīb na aao maiñ aa.ina hī sahī

bahut qarīb se dhuñdlā dikhā.ī detā hai

ye kyā sitam hai ki bastī ke ek hī ghar meñ

ka.ī gharoñ kā ujālā dikhā.ī detā hai

koī ḳhayāl na sūrat na zā.iqa na pukār

bas ek vahm guzartā dikhā.ī detā hai

ḳhizāñ kī dhuup meñ maiñ ne kahā na thā ki mujhe

harā-bharā koī saaya dikhā.ī detā hai

kisī ke haath meñ kaasa nahīñ magar 'āsim'

har ek haath meñ kaasa dikhā.ī detā hai

ghazal ghazal wahi chehra dikhai deta hai

suKHan suKHan wahi goya dikhai deta hai

qaba-e-surKH mein kya hai ki dekhte rahiye

wo har libas mein achchha dikhai deta hai

bahut qarib na aao main aaina hi sahi

bahut qarib se dhundla dikhai deta hai

ye kya sitam hai ki basti ke ek hi ghar mein

kai gharon ka ujala dikhai deta hai

koi KHayal na surat na zaiqa na pukar

bas ek wahm guzarta dikhai deta hai

KHizan ki dhup mein main ne kaha na tha ki mujhe

hara-bhara koi saya dikhai deta hai

kisi ke hath mein kasa nahin magar 'asim'

har ek hath mein kasa dikhai deta hai