ghazal mein fan ka jauhar jab dikhate hain ghazal wale

ġhazal meñ fan kā jauhar jab dikhāte haiñ ġhazal vaale

zamīñ ko āsmāñ jaisā banāte haiñ ġhazal vaale

badal dete haiñ ḳhāroñ kī ḳhalish gul kī nazākat se

zabāñ shabnam kī sho.aloñ ko sikhāte haiñ ġhazal vaale

kabhī pahle ġhazal un kī kabhī ḳhud peshtar is se

kisī ke dīda-o-dil meñ samāte haiñ ġhazal vaale

agar aahoñ se apnī koī misra.a gaḌ.h bhī lete haiñ

to ashkoñ se girah us par lagāte haiñ ġhazal vaale

vufūr-e-shauq kī majbūriyāñ bhī kaisī kaisī haiñ

kisī kā naam likh likh kar miTāte haiñ ġhazal vaale

zamīñ zarḳhez hai ye 'mīr' 'ġhālib' aur 'momin' kī

ki jis meñ fasl-e-tāza ab ugāte haiñ ġhazal vaale

ba-ijz-e-ilm-o-dānish jaao un kī bazm meñ 'tarzī'

ġhazal kī sher-bandī par bulāte haiñ ġhazal vaale

ghazal mein fan ka jauhar jab dikhate hain ghazal wale

zamin ko aasman jaisa banate hain ghazal wale

badal dete hain KHaron ki KHalish gul ki nazakat se

zaban shabnam ki shoalon ko sikhate hain ghazal wale

kabhi pahle ghazal un ki kabhi KHud peshtar is se

kisi ke dida-o-dil mein samate hain ghazal wale

agar aahon se apni koi misra gaDh bhi lete hain

to ashkon se girah us par lagate hain ghazal wale

wufur-e-shauq ki majburiyan bhi kaisi kaisi hain

kisi ka nam likh likh kar miTate hain ghazal wale

zamin zarKHez hai ye 'mir' 'ghaalib' aur 'momin' ki

ki jis mein fasl-e-taza ab ugate hain ghazal wale

ba-ijz-e-ilm-o-danish jao un ki bazm mein 'tarzi'

ghazal ki sher-bandi par bulate hain ghazal wale