ghabraiye kyun zindagi be-kaif agar hai

ghabrā.iye kyuuñ zindagī be-kaif agar hai

āḳhir shab-e-tārīk kā anjām sahar hai

vo shaam kī sūrat hai na vo rañg-e-sahar hai

kis kaukab-e-manhūs kā yārab ye asar hai

afsāna-e-ġham sīna-e-bulbul meñ hai fariyād

aurāq-e-gul-e-tar meñ ba-unvān-e-digar hai

be-dard hai insāñ to haiñ sab is ke hunar aib

hai dil meñ agar dard to har aib hunar hai

sābit hai ba-har-taur ġham-e-ishq ram-e-husn

ārām ko pūchho to idhar hai na udhar hai

masnūa ko sān.e.a se judā kar nahīñ saktā

ā.īne meñ aks-e-hunar-e-ā.ina-gar hai

rotī huī āñkhoñ meñ hai ġharqāb tabassum

punjab hai dehlī meñ jo ab rāhguzar hai

phūloñ meñ tirā rañg hai kāñToñ meñ tirī nok

ye husn tirā hai ki mirā husn-e-nazar hai

'mahrūm' magar ishq tumhārā hai riyā.ī

fariyād meñ tāsīr na aahoñ meñ asar hai

ghabraiye kyun zindagi be-kaif agar hai

aaKHir shab-e-tarik ka anjam sahar hai

wo sham ki surat hai na wo rang-e-sahar hai

kis kaukab-e-manhus ka yarab ye asar hai

afsana-e-gham sina-e-bulbul mein hai fariyaad

auraq-e-gul-e-tar mein ba-unwan-e-digar hai

be-dard hai insan to hain sab is ke hunar aib

hai dil mein agar dard to har aib hunar hai

sabit hai ba-har-taur gham-e-ishq ram-e-husn

aaram ko puchho to idhar hai na udhar hai

masnua ko sanea se juda kar nahin sakta

aaine mein aks-e-hunar-e-aina-gar hai

roti hui aankhon mein hai gharqab tabassum

punjab hai dehli mein jo ab rahguzar hai

phulon mein tera rang hai kanTon mein teri nok

ye husn tera hai ki mera husn-e-nazar hai

'mahrum' magar ishq tumhaara hai riyai

fariyaad mein tasir na aahon mein asar hai