ghar ke baDe-buDhon ko yahi kahte suna hai

ghar ke baḌe-būḌhoñ ko yahī kahte sunā hai

jhuk jhuk ke jo miltā hai vahī qad meñ baḌā hai

vo shaḳhs havā ke kisī jhoñke kī tarah thā

ab habs baḌhā hai to ye ehsās huā hai

lafzoñ ke libāde meñ chhupī baat ko samjho

kab ham ne tirī zaat se inkār kiyā hai

ik baab ke khulne se ka.ī baab haiñ khulte

ye ilm kā nukta mujhe ik dar se milā hai

har baat ke parde meñ koī baat chhupī hai

ham ne tire tevar se ye pahchān liyā hai

shāyad ki koī rabt kī sūrat nikal aa.e

be-rabt ibārat ko ka.ī baar paḌhā hai

ik ḳhauf musallat hai sabhī baaġh pe 'āsif'

phūloñ ne bhī ḳhushbū ko yahāñ qaid kiyā hai

ghar ke baDe-buDhon ko yahi kahte suna hai

jhuk jhuk ke jo milta hai wahi qad mein baDa hai

wo shaKHs hawa ke kisi jhonke ki tarah tha

ab habs baDha hai to ye ehsas hua hai

lafzon ke libaade mein chhupi baat ko samjho

kab hum ne teri zat se inkar kiya hai

ek bab ke khulne se kai bab hain khulte

ye ilm ka nukta mujhe ek dar se mila hai

har baat ke parde mein koi baat chhupi hai

hum ne tere tewar se ye pahchan liya hai

shayad ki koi rabt ki surat nikal aae

be-rabt ibarat ko kai bar paDha hai

ek KHauf musallat hai sabhi bagh pe 'asif'

phulon ne bhi KHushbu ko yahan qaid kiya hai