ghar mein bechaini ho to agle safar ki sochna

ghar meñ bechainī ho to agle safar kī sochnā

phir safar nākām ho jaa.e to ghar kī sochnā

hijr meñ imkān itne vasl sirf ik vāqi.a

vus.at-e-sahrā meñ kyā dīvār-o-dar kī sochnā

ya.anī ghar aur dasht donoñ lāzim-o-malzūm haiñ

qā.eda ye hai idhar rahnā udhar kī sochnā

is tarah jiinā ki auroñ kā bharam qaa.em rahe

maut bar-haq hai magar us chāra-gar kī sochnā

zindagī bhar zinda rahne kī yahī tarkīb hai

us taraf jaanā nahīñ bilkul jidhar kī sochnā

tum shujā-ḳhāvar ho duniyā-dār aur maiñ jān-dār

maiñ to bas aa.heñ bharūñgā tum asar kī sochnā

ghar mein bechaini ho to agle safar ki sochna

phir safar nakaam ho jae to ghar ki sochna

hijr mein imkan itne wasl sirf ek waqia

wusat-e-sahra mein kya diwar-o-dar ki sochna

yani ghar aur dasht donon lazim-o-malzum hain

qaeda ye hai idhar rahna udhar ki sochna

is tarah jina ki auron ka bharam qaem rahe

maut bar-haq hai magar us chaara-gar ki sochna

zindagi bhar zinda rahne ki yahi tarkib hai

us taraf jaana nahin bilkul jidhar ki sochna

tum shuja-KHawar ho duniya-dar aur main jaan-dar

main to bas aahen bharunga tum asar ki sochna