ajab surur mila hai mujhe dua kar ke

ajab surūr milā hai mujhe duā kar ke

ki muskurāyā ḳhudā bhī sitāra vā kar ke

gadā-gadī bhī ik uslūb-e-fan hai jab maiñ ne

usī ko maañg liyā us se iltijā kar ke

shab-e-firāq ke har jabr ko shikast huī

ki maiñ ne sub.h to kar lī ḳhudā ḳhudā kar ke

ye soch kar ki kabhī to javāb aa.egā

maiñ us ke dar pe khaḌā rah gayā sadā kar ke

ye chāra-gar haiñ ki ik ijtimā-e-bad-zauqāñ

vo mujh ko dekheñ tirī zaat se judā kar ke

ḳhudā bhī un ko na baḳhshe to lutf aa jaa.e

jo apne-āp se sharminda huuñ ḳhatā kar ke

ḳhud apnī zaat pe to e'timād puḳhta huā

'nadīm' yuuñ to mujhe kyā milā vafā kar ke

ajab surur mila hai mujhe dua kar ke

ki muskuraya KHuda bhi sitara wa kar ke

gada-gadi bhi ek uslub-e-fan hai jab main ne

usi ko mang liya us se iltija kar ke

shab-e-firaq ke har jabr ko shikast hui

ki main ne subh to kar li KHuda KHuda kar ke

ye soch kar ki kabhi to jawab aaega

main us ke dar pe khaDa rah gaya sada kar ke

ye chaara-gar hain ki ek ijtima-e-bad-zauqan

wo mujh ko dekhen teri zat se juda kar ke

KHuda bhi un ko na baKHshe to lutf aa jae

jo apne-ap se sharminda hun KHata kar ke

KHud apni zat pe to e'timad puKHta hua

'nadim' yun to mujhe kya mila wafa kar ke