gila-shikwa kahan rahta hai dil ham-saz hota hai

gila-shikva kahāñ rahtā hai dil ham-sāz hotā hai

mohabbat meñ to har ik jurm nazar-andāz hotā hai

laboñ par qufl āñkhoñ meñ lihāz-e-nāz hotā hai

mohabbat karne vāloñ kā ajab andāz hotā hai

ishāre kaam karte haiñ mohabbat meñ nigāhoñ ke

nigāhoñ se hī bāham inkishāf-e-rāz hotā hai

guzartī hai jo us par sab gavārā kartā hai ḳhush ḳhush

jafāoñ se tumhārī dil kahāñ nārāz hotā hai

har ik se ham to be-shak karte haiñ talqīn ulfat kī

baḌā taqdīr vaalā hī koī ham-sāz hotā hai

sukūn-e-qalb hāsil hai pareshāñ maiñ nahīñ dilbar

jo tum se duur hotā hai vahī nā-sāz hotā hai

maiñ huuñ shākī o nāzāñ to faqat is rasm-e-duniyā se

vahī ġhammāz ho jaatā hai jo hamrāz hotā hai

nahīñ hai gar ye duniyā bhī haqīqat se hī vābasta

to kyuuñ dil is kī jānib mā.il-e-parvāz hotā hai

baḌī tabdīliyāñ hotī haiñ ulfat un se hone par

zamīr-e-ḳhud-ġharz kā sāz-e-be-āvāz hotā hai

samajhte haiñ hamīñ haiñ hukmarāñ is saare aalam ke

nazar meñ jab hamārī vo hasīñ andāz hotā hai

nazar aatā hai har sū jalvā-e-anvar meñ ġharq aalam

dil-e-pur-kaif behis dar-haqīqat baaz hotā hai

judā-gāna magar andāz hotā hai har āshiq kā

machātā hai koī ġhul koī be-āvāz hotā hai

safar manzil-ba-manzil tai kiyā jaatā hai ulfat kā

baḌī muddat meñ sar vo bārgāh-e-nāz hotā hai

vahī hai kāmrāñ āshiq jo us ko paar kar jaa.e

diloñ ke darmiyāñ jo ik jahān-e-rāz hotā hai

baḌhā aur un se vāqif ho ki āzār-e-ġham-e-furqat

duī ke farsh kā ehsās be-andāz hotā hai

tanāsuḳh hai musalsal ibtidā-e-āfrīnash meñ

hayāt-e-jāvedāñ meñ kaun daḳhl-andāz hotā hai

na ham-pesha na ham-ḳhāna na ham-piyāla na ham-bistar

vahī apnā hai 'rahbar' jo bhī ham-āvāz hotā hai

gila-shikwa kahan rahta hai dil ham-saz hota hai

mohabbat mein to har ek jurm nazar-andaz hota hai

labon par qufl aankhon mein lihaz-e-naz hota hai

mohabbat karne walon ka ajab andaz hota hai

ishaare kaam karte hain mohabbat mein nigahon ke

nigahon se hi baham inkishaf-e-raaz hota hai

guzarti hai jo us par sab gawara karta hai KHush KHush

jafaon se tumhaari dil kahan naraaz hota hai

har ek se hum to be-shak karte hain talqin ulfat ki

baDa taqdir wala hi koi ham-saz hota hai

sukun-e-qalb hasil hai pareshan main nahin dilbar

jo tum se dur hota hai wahi na-saz hota hai

main hun shaki o nazan to faqat is rasm-e-duniya se

wahi ghammaz ho jata hai jo hamraaz hota hai

nahin hai gar ye duniya bhi haqiqat se hi wabasta

to kyun dil is ki jaanib mail-e-parwaz hota hai

baDi tabdiliyan hoti hain ulfat un se hone par

zamir-e-KHud-gharz ka saz-e-be-awaz hota hai

samajhte hain hamin hain hukmaran is sare aalam ke

nazar mein jab hamari wo hasin andaz hota hai

nazar aata hai har su jalwa-e-anwar mein gharq aalam

dil-e-pur-kaif behis dar-haqiqat baz hota hai

juda-gana magar andaz hota hai har aashiq ka

machata hai koi ghul koi be-awaz hota hai

safar manzil-ba-manzil tai kiya jata hai ulfat ka

baDi muddat mein sar wo bargah-e-naz hota hai

wahi hai kaamran aashiq jo us ko par kar jae

dilon ke darmiyan jo ek jahan-e-raaz hota hai

baDha aur un se waqif ho ki aazar-e-gham-e-furqat

dui ke farsh ka ehsas be-andaz hota hai

tanasuKH hai musalsal ibtida-e-afrinash mein

hayat-e-jawedan mein kaun daKHl-andaz hota hai

na ham-pesha na ham-KHana na ham-piyala na ham-bistar

wahi apna hai 'rahbar' jo bhi ham-awaz hota hai