giri gir kar uThi palTi to jo kuchh tha uTha lai

girī gir kar uThī palTī to jo kuchh thā uThā laa.ī

nazar kyā kīmiyā thī rañg chehroñ se uḌā laa.ī

ḳhudā ke vāste saffākiyāñ ye kis se sīkhī haiñ

nazar se pyaar māñgā thā vo ik ḳhanjar uThā laa.ī

na hasrat hī nikaltī hai na dil ko aag lagtī hai

mirī hastī mire dāman meñ kyā kāñTā lagā laa.ī

vo sab badmastiyāñ thiiñ zar kī ab zar hai na piite haiñ

hamārī muflisī ḳhud raah par ham ko lagā laa.ī

miTāne ko hamāre ye zamīn-o-āsmāñ donoñ

hamesha mil ke chalte haiñ ba-īñ pastī-o-bālā.ī

jo kuchh dekhā na dekhā jo sunī vo an-sunī 'shā.ir'

na aa.e ham yahāñ ye zindagī muft-e-ḳhudā laa.ī

giri gir kar uThi palTi to jo kuchh tha uTha lai

nazar kya kimiya thi rang chehron se uDa lai

KHuda ke waste saffakiyan ye kis se sikhi hain

nazar se pyar manga tha wo ek KHanjar uTha lai

na hasrat hi nikalti hai na dil ko aag lagti hai

meri hasti mere daman mein kya kanTa laga lai

wo sab badmastiyan thin zar ki ab zar hai na pite hain

hamari muflisi KHud rah par hum ko laga lai

miTane ko hamare ye zamin-o-asman donon

hamesha mil ke chalte hain ba-in pasti-o-baalai

jo kuchh dekha na dekha jo suni wo an-suni 'shair'

na aae hum yahan ye zindagi muft-e-KHuda lai