giri jo barq chaman ko tajalliyan bhi milin

girī jo barq chaman ko tajalliyāñ bhī milīñ

aur us ke saath parindoñ kī boTiyāñ bhī milīñ

vo jis makāñ se milī kotvāl-e-shahr kī laash

vahīñ se TuuTī huī chand chūḌiyāñ bhī milīñ

nikālīñ bachchoñ kī lāsheñ jo ham ne malbe se

na sirf baste mile balki taḳhtiyāñ bhī milīñ

zabāneñ kaaT ke us ne jahāñ chhupā dī thiiñ

vahāñ se ahl-e-qalam kī kuchh uñgliyāñ bhī milīñ

ye aur baat barī kar diyā gayā qātil

agarche qatl kī vāzeh nishāniyāñ bhī milīñ

ki jaise qaaf kī vaadī meñ aa ga.e 'be-dil'

musāfirat meñ hameñ aisī bastiyāñ bhī milīñ

giri jo barq chaman ko tajalliyan bhi milin

aur us ke sath parindon ki boTiyan bhi milin

wo jis makan se mili kotwal-e-shahr ki lash

wahin se TuTi hui chand chuDiyan bhi milin

nikalin bachchon ki lashen jo hum ne malbe se

na sirf baste mile balki taKHtiyan bhi milin

zabanen kaT ke us ne jahan chhupa di thin

wahan se ahl-e-qalam ki kuchh ungliyan bhi milin

ye aur baat bari kar diya gaya qatil

agarche qatl ki wazeh nishaniyan bhi milin

ki jaise qaf ki wadi mein aa gae 'be-dil'

musafirat mein hamein aisi bastiyan bhi milin