go sirr-e-irtiqa-o-baqa mera jism hai

go sirr-e-irtiqā-o-baqā merā jism hai

suntā huuñ to fanā kī sadā merā jism hai

maiñ huuñ azal se vaqt kī gardish kā rāz-dār

ye bazm-e-kā.enāt hai kyā merā jism hai

aisā rahā chaman meñ ki mahsūs ye huā

jo gul khilā jo sabza ugā merā jism hai

āñkhoñ ke māvarā jhalak uThtā hai gāh-gāh

vo shoḳh jis kī saada qabā merā jism hai

merī talāsh merī talab be-had-o-hisāb

merī hudūd merī sazā merā jism hai

shab kī dabīz tīrgiyoñ ke javāb meñ

ye ek TimTimātā diyā merā jism hai

ik mushta.il hujūm sar-e-rahguzār thā

pūchhā ki kyā hai maiñ ne kahā merā jism hai

go sirr-e-irtiqa-o-baqa mera jism hai

sunta hun to fana ki sada mera jism hai

main hun azal se waqt ki gardish ka raaz-dar

ye bazm-e-kaenat hai kya mera jism hai

aisa raha chaman mein ki mahsus ye hua

jo gul khila jo sabza uga mera jism hai

aankhon ke mawara jhalak uThta hai gah-gah

wo shoKH jis ki sada qaba mera jism hai

meri talash meri talab be-had-o-hisab

meri hudud meri saza mera jism hai

shab ki dabiz tirgiyon ke jawab mein

ye ek TimTimata diya mera jism hai

ek mushtail hujum sar-e-rahguzar tha

puchha ki kya hai main ne kaha mera jism hai