ghubar-e-fikr ko tahrir karta rahta hun

ġhubār-e-fikr ko tahrīr kartā rahtā huuñ

maiñ apnā dard hama-gīr kartā rahtā huuñ

ridā-e-lafz chaḌhātā huuñ turbat-e-dil par

ġhazal ko ḳhāk-e-dar-e-'mīr' kartā rahtā huuñ

nabard-āzmā ho kar hayāt se apnī

hamesha fat.h kī tadbīr kartā rahtā huuñ

na jaane kaun sā ḳhāka kalām-e-fan Thahre

har ik ḳhayāl ko tasvīr kartā rahtā huuñ

badaltā rahtā huuñ girte hue dar-o-dīvār

makān-e-ḳhasta meñ ta.amīr kartā rahtā huuñ

lahū ragoñ kā masāfat nichoḌ letī hai

maiñ phir bhī ḳhud ko safar-gīr kartā rahtā huuñ

udaas rahtī haiñ mujh meñ sadāqateñ merī

maiñ lab-kushā.ī meñ tāḳhīr kartā rahtā huuñ

sadā.eñ detī haiñ 'sālim' bulandiyāñ lekin

zamīñ ko paañv kī zanjīr kartā rahtā huuñ

ghubar-e-fikr ko tahrir karta rahta hun

main apna dard hama-gir karta rahta hun

rida-e-lafz chaDhata hun turbat-e-dil par

ghazal ko KHak-e-dar-e-'mir' karta rahta hun

nabard-azma ho kar hayat se apni

hamesha fath ki tadbir karta rahta hun

na jaane kaun sa KHaka kalam-e-fan Thahre

har ek KHayal ko taswir karta rahta hun

badalta rahta hun girte hue dar-o-diwar

makan-e-KHasta mein tamir karta rahta hun

lahu ragon ka masafat nichoD leti hai

main phir bhi KHud ko safar-gir karta rahta hun

udas rahti hain mujh mein sadaqaten meri

main lab-kushai mein taKHir karta rahta hun

sadaen deti hain 'salim' bulandiyan lekin

zamin ko panw ki zanjir karta rahta hun