guhar ko jauhari sarraf zar ko dekhte hain

guhar ko jauharī sarrāf zar ko dekhte haiñ

bashar ke haiñ jo mubassir bashar ko dekhte haiñ

na ḳhuub o zisht na aib-o-hunar ko dekhte haiñ

ye chiiz kyā hai bashar ham bashar ko dekhte haiñ

vo dekheñ bazm meñ pahle kidhar ko dekhte haiñ

mohabbat aaj tire ham asar ko dekhte haiñ

vo apnī burrish-e-teġh-e-nazar ko dekhte haiñ

ham un ko dekhte haiñ aur jigar ko dekhte haiñ

jab apne girya o soz-e-jigar ko dekhte haiñ

sulagtī aag meñ ham ḳhushk-o-tar ko dekhte haiñ

rafīq jab mire zaḳhm-e-jigar ko dekhte haiñ

to chārāgar unheñ vo chārāgar ko dekhte haiñ

na tumtarāq ko ne karr-o-far ko dekhte haiñ

ham aadmī ke sifāt o siyar ko dekhte haiñ

jo raat ḳhvāb meñ us fitna-gar ko dekhte haiñ

na pūchh ham jo qayāmat sahar ko dekhte haiñ

vo roz ham ko guzartā hai jaise 'iid kā din

kabhī jo shakl tumhārī sahar ko dekhte haiñ

jahāñ ke ā.inoñ se dil kā aa.ina hai judā

is aa.ine meñ ham ā.īna-gar ko dekhte haiñ

banā ke ā.īna dekhe hai pahle ā.īna-gar

hunar-var apne hī aib-o-hunar ko dekhte haiñ

guhar ko jauhari sarraf zar ko dekhte hain

bashar ke hain jo mubassir bashar ko dekhte hain

na KHub o zisht na aib-o-hunar ko dekhte hain

ye chiz kya hai bashar hum bashar ko dekhte hain

wo dekhen bazm mein pahle kidhar ko dekhte hain

mohabbat aaj tere hum asar ko dekhte hain

wo apni burrish-e-tegh-e-nazar ko dekhte hain

hum un ko dekhte hain aur jigar ko dekhte hain

jab apne girya o soz-e-jigar ko dekhte hain

sulagti aag mein hum KHushk-o-tar ko dekhte hain

rafiq jab mere zaKHm-e-jigar ko dekhte hain

to chaaragar unhen wo chaaragar ko dekhte hain

na tumtaraq ko ne karr-o-far ko dekhte hain

hum aadmi ke sifat o siyar ko dekhte hain

jo raat KHwab mein us fitna-gar ko dekhte hain

na puchh hum jo qayamat sahar ko dekhte hain

wo roz hum ko guzarta hai jaise 'id ka din

kabhi jo shakl tumhaari sahar ko dekhte hain

jahan ke aainon se dil ka aaina hai juda

is aaine mein hum aaina-gar ko dekhte hain

bana ke aaina dekhe hai pahle aaina-gar

hunar-war apne hi aib-o-hunar ko dekhte hain