gulshan-e-ishq mein ghuncha bhi kali hota hai

gulshan-e-ishq meñ ġhuncha bhī kalī hotā hai

naam āshiq kā bhī ma.ashūq-alī hotā hai

ḳhaan kahtā hai vahāñ mūñ-gphalī hotā hai

phuul hotī hai pishāvar meñ kalī hotā hai

jab vo paḌhtī hai tarannum se ġhazal kā matl.a

us kī āñkhoñ meñ bhī ītā-e-jalī hotā hai

ek biivī pe jo kartā hai qanā.at tā-umr

vo to shauhar nahīñ hotā hai valī hotā hai

saas ne aaj khilā.ī hai jalebī mujh ko

niim kā peḌ bhī misrī kī Dalī hotā hai

marshall-law kā maiñ haamī to nahīñ huuñ lekin

daur-e-jamhūr bhī ab band galī hotā hai

jis ke lahje meñ ho shā.istagī-e-tañz-e-latīf

aisā shā.er hī zarīf-e-azalī hotā hai

gulshan-e-ishq mein ghuncha bhi kali hota hai

nam aashiq ka bhi mashuq-ali hota hai

KHan kahta hai wahan mun-gphali hota hai

phul hoti hai pishawar mein kali hota hai

jab wo paDhti hai tarannum se ghazal ka matla

us ki aankhon mein bhi ita-e-jali hota hai

ek biwi pe jo karta hai qanaat ta-umr

wo to shauhar nahin hota hai wali hota hai

sas ne aaj khilai hai jalebi mujh ko

nim ka peD bhi misri ki Dali hota hai

marshall-law ka main hami to nahin hun lekin

daur-e-jamhur bhi ab band gali hota hai

jis ke lahje mein ho shaistagi-e-tanz-e-latif

aisa shaer hi zarif-e-azali hota hai