gunah-gar-e-wafa laeq-e-saza likh do

gunāh-gār-e-vafā lā.eq-e-sazā likh do

mire ḳhilāf zamāne kā faisla likh do

ghirī hai dā.era-e-karb-e-āgahī meñ hayāt

isī hisār meñ rahne kā hausla likh do

har ek lamha hai nok-e-sināñ pe sar apnā

mujhe sitam-zada-e-jazba-e-anā likh do

maiñ dūsroñ se bhī kuchh dād-e-zabt-e-ġham pā.ūñ

har ek lab pe mire dil kā mudda.ā likh do

fanā ke dasht meñ rahte hue zamāna huā

mire junūñ ko sar-e-vādī-e-baqā likh do

khulā mire liye bāb-e-asar nahīñ na sahī

mire laboñ pe koī be-asar duā likh do

navāh-e-jāñ meñ kabhī to bahār aa.egī

kabhī to badlegī is dasht kī fazā likh do

urūs-e-fikr kī saada hatheliyoñ ke naam

tamām rañg-e-shafaq surḳhī-e-hinā likh do

tumhāre hāthoñ meñ shā.ir kā hai qalam ai 'nāz'

kitāb-e-dil pe mohabbat kā hāshiya likh do

gunah-gar-e-wafa laeq-e-saza likh do

mere KHilaf zamane ka faisla likh do

ghiri hai daera-e-karb-e-agahi mein hayat

isi hisar mein rahne ka hausla likh do

har ek lamha hai nok-e-sinan pe sar apna

mujhe sitam-zada-e-jazba-e-ana likh do

main dusron se bhi kuchh dad-e-zabt-e-gham paun

har ek lab pe mere dil ka muddaa likh do

fana ke dasht mein rahte hue zamana hua

mere junun ko sar-e-wadi-e-baqa likh do

khula mere liye bab-e-asar nahin na sahi

mere labon pe koi be-asar dua likh do

nawah-e-jaan mein kabhi to bahaar aaegi

kabhi to badlegi is dasht ki faza likh do

urus-e-fikr ki sada hatheliyon ke nam

tamam rang-e-shafaq surKHi-e-hina likh do

tumhaare hathon mein shair ka hai qalam ai 'naz'

kitab-e-dil pe mohabbat ka hashiya likh do