gunahgaron ki uzr-KHwahi hamare sahib qubul kije

gunāhgāroñ kī uzr-ḳhvāhī hamāre sāhib qubūl kiije

karam tumhāre kī kar tavaqqo.a ye arz kiite haiñ maan liije

ġharīb aajiz jafā ke maare faqīr be-kas gadā tumhāre

so veñ sitam siiñ mareñ bichāre agar jo un par karam na kiije

paḌe haiñ ham biich meñ balā ke karam karo vāste ḳhudā ke

hue haiñ bande tirī razā ke jo kuchh ke haq meñ hamāre kiije

bipat paḌī hai jinhoñ pe ġham kī jigar meñ ātish lagī alam kī

kahāñ hai tāqat unheñ sitam kī ki jin pe iitā itaab kiije

hamāre dil pe jo kuchh ki guzrā tumhāre dil par agar ho zāhir

tū kuchh ajab nahiñ pathar kī mānind agar yathā dil kī sun pasīje

agar gunah bhī jo kuchh huā hai ki jis siiñ iitā zarar huā hai

to ham siiñ vo be-ḳhabar huā hai diloñ siiñ is kuuñ bhulā.e diije

hue haiñ ham 'ābrū' nishāne lage haiñ ta.ane ke tiir khāne

tirā burā ho are zamāne batā tū is tarah kyuuñ ki jiije

gunahgaron ki uzr-KHwahi hamare sahib qubul kije

karam tumhaare ki kar tawaqqoa ye arz kite hain man lije

gharib aajiz jafa ke mare faqir be-kas gada tumhaare

so wen sitam sin maren bichaare agar jo un par karam na kije

paDe hain hum bich mein bala ke karam karo waste KHuda ke

hue hain bande teri raza ke jo kuchh ke haq mein hamare kije

bipat paDi hai jinhon pe gham ki jigar mein aatish lagi alam ki

kahan hai taqat unhen sitam ki ki jin pe ita itab kije

hamare dil pe jo kuchh ki guzra tumhaare dil par agar ho zahir

tu kuchh ajab nahin pathar ki manind agar yatha dil ki sun pasije

agar gunah bhi jo kuchh hua hai ki jis sin ita zarar hua hai

to hum sin wo be-KHabar hua hai dilon sin is kun bhulae dije

hue hain hum 'abru' nishane lage hain tane ke tir khane

tera bura ho are zamane bata tu is tarah kyun ki jije