gungunate hue aanchal ki hawa de mujhko

gungunāte hue āñchal kī havā de mujh ko

uñgliyāñ pher ke bāloñ meñ sulā de mujh ko

jis tarah fāltū gul-dān paḌe rahte haiñ

apne ghar ke kisī kone se lagā de mujh ko

yaad kar ke mujhe taklīf hī hotī hogī

ek qissa huuñ purānā sā bhulā de mujh ko

Dūbte Dūbte āvāz tirī sun jā.ūñ

āḳhirī baar to sāhil se sadā de mujh ko

maiñ tire hijr meñ chup-chāp na mar jā.ūñ kahīñ

maiñ huuñ sakte meñ kabhī aa ke rulā de mujh ko

dekh maiñ ho gayā badnām kitāboñ kī tarah

merī tash.hīr na kar ab to jalā de mujh ko

rūThnā terā mirī jaan liye jaatā hai

aise nārāz na ho hañs ke dikhā de mujh ko

aur kuchh bhī nahīñ māñgā mire mālik tujh se

us kī galiyoñ meñ paḌī ḳhaak banā de mujh ko

log kahte haiñ ki ye ishq nigal jaatā hai

maiñ bhī is ishq meñ aayā huuñ duā de mujh ko

yahī auqāt hai merī tire jīvan meñ ki maiñ

koī kamzor sā lamha huuñ bhulā de mujh ko

gungunate hue aanchal ki hawa de mujh ko

ungliyan pher ke baalon mein sula de mujh ko

jis tarah faltu gul-dan paDe rahte hain

apne ghar ke kisi kone se laga de mujh ko

yaad kar ke mujhe taklif hi hoti hogi

ek qissa hun purana sa bhula de mujh ko

Dubte Dubte aawaz teri sun jaun

aaKHiri bar to sahil se sada de mujh ko

main tere hijr mein chup-chap na mar jaun kahin

main hun sakte mein kabhi aa ke rula de mujh ko

dekh main ho gaya badnam kitabon ki tarah

meri tashhir na kar ab to jala de mujh ko

ruThna tera meri jaan liye jata hai

aise naraaz na ho hans ke dikha de mujh ko

aur kuchh bhi nahin manga mere malik tujh se

us ki galiyon mein paDi KHak bana de mujh ko

log kahte hain ki ye ishq nigal jata hai

main bhi is ishq mein aaya hun dua de mujh ko

yahi auqat hai meri tere jiwan mein ki main

koi kamzor sa lamha hun bhula de mujh ko