guzar gai hai abhi saat-e-guzishta bhi

guzar ga.ī hai abhī sā.at-e-guzishta bhī

nazar uThā ki guzar jā.egā ye lamha bhī

bahut qarīb se ho kar guzar ga.ī duniyā

bahut qarīb se dekhā hai ye tamāshā bhī

guzar rahe haiñ jo bār-e-nazar uThā.e hue

ye log mahv-e-tamāshā bhī haiñ tamāshā bhī

vo din bhī the ki tirī ḳhvāb-gīñ nigāhoñ se

pukārtī thī mujhe zindagī bhī duniyā bhī

jo be-sabātī-e-ālam pe bahs thī sar-e-bazm

maiñ chup rahā ki mujhe yaad thā vo chehrā bhī

kabhī to chāñd bhī utregā dil ke āñgan meñ

kabhī to mauj meñ aa.egā ye kinārā bhī

nikāl dil se ga.e mausamoñ kī yaad 'ajmal'

tirī talāsh meñ imroz bhī hai fardā bhī

guzar gai hai abhi saat-e-guzishta bhi

nazar uTha ki guzar jaega ye lamha bhi

bahut qarib se ho kar guzar gai duniya

bahut qarib se dekha hai ye tamasha bhi

guzar rahe hain jo bar-e-nazar uThae hue

ye log mahw-e-tamasha bhi hain tamasha bhi

wo din bhi the ki teri KHwab-gin nigahon se

pukarti thi mujhe zindagi bhi duniya bhi

jo be-sabaati-e-alam pe bahs thi sar-e-bazm

main chup raha ki mujhe yaad tha wo chehra bhi

kabhi to chand bhi utrega dil ke aangan mein

kabhi to mauj mein aaega ye kinara bhi

nikal dil se gae mausamon ki yaad 'ajmal'

teri talash mein imroz bhi hai farda bhi