guzre nahin aur guzar gae hum

guzre nahīñ aur guzar ga.e ham

is bhiiḌ kā kaam kar ga.e ham

ye sahn gavāh hai hamārā

is ghar meñ bhī dar-ba-dar ga.e ham

daryāft ko zaḳhm kī chale the

tārīḳh kī dhaar par ga.e ham

is baat pe ab ulajh rahe haiñ

baaqī the to phir kidhar ga.e ham

tasvīr se bāhar aa.e kuchh der

ghar bhar ko udaas kar ga.e ham

varna ye zamīn miT chalī thī

bar-vaqt idhar udhar ga.e ham

ḳhālī the aur is qadar the ḳhālī

bas ek nigah se bhar ga.e ham

the kaun-o-makāñ makāñ se bāhar

bāhar kisī shor par ga.e ham

guzre nahin aur guzar gae hum

is bhiD ka kaam kar gae hum

ye sahn gawah hai hamara

is ghar mein bhi dar-ba-dar gae hum

daryaft ko zaKHm ki chale the

tariKH ki dhaar par gae hum

is baat pe ab ulajh rahe hain

baqi the to phir kidhar gae hum

taswir se bahar aae kuchh der

ghar bhar ko udas kar gae hum

warna ye zamin miT chali thi

bar-waqt idhar udhar gae hum

KHali the aur is qadar the KHali

bas ek nigah se bhar gae hum

the kaun-o-makan makan se bahar

bahar kisi shor par gae hum