hadisa aisa bhi zer-e-asman hona hi tha

hādisa aisā bhī zer-e-āsmāñ honā hī thā

barg-e-gul ko ḳhaak sho.ale ko dhuāñ honā hī thā

talḳh jitnī ho haqīqat ko ayaañ honā hī thā

zindagī ko saat pardoñ meñ nihāñ honā hī thā

jo na sunñā thā vo afsāna bayāñ honā hī thā

ya.anī apnī koshishoñ ko rā.egāñ honā hī thā

reza reza TuuT kar bikhre dar-o-dīvār-e-dil

lamha lamha ḳhāna-e-jāñ kā ziyāñ honā hī thā

sā.at-e-be-mehr merī zindagī ko Das ga.ī

lamha-e-saffāk ko mujh par ayaañ honā hī thā

vaqt se pahle havā ne kaan meñ kuchh kah diyā

fasl-e-gul ke aate hī dil kā ziyāñ honā hī thā

jāntā huuñ naaz phir bhī sabr kī tāqat nahīñ

bāġh-e-dil ko ek din nazr-e-ḳhizāñ honā hī thā

hadisa aisa bhi zer-e-asman hona hi tha

barg-e-gul ko KHak shoale ko dhuan hona hi tha

talKH jitni ho haqiqat ko ayan hona hi tha

zindagi ko sat pardon mein nihan hona hi tha

jo na sunna tha wo afsana bayan hona hi tha

yani apni koshishon ko raegan hona hi tha

reza reza TuT kar bikhre dar-o-diwar-e-dil

lamha lamha KHana-e-jaan ka ziyan hona hi tha

saat-e-be-mehr meri zindagi ko Das gai

lamha-e-saffak ko mujh par ayan hona hi tha

waqt se pahle hawa ne kan mein kuchh kah diya

fasl-e-gul ke aate hi dil ka ziyan hona hi tha

jaanta hun naz phir bhi sabr ki taqat nahin

bagh-e-dil ko ek din nazr-e-KHizan hona hi tha