haal aisa nahin ki tum se kahen

haal aisā nahīñ ki tum se kaheñ

ek jhagḌā nahīñ ki tum se kaheñ

zer-e-lab aah bhī muhāl huī

dard itnā nahīñ ki tum se kaheñ

tum zuleḳhā nahīñ ki ham se kaho

ham masīhā nahīñ ki tum se kaheñ

sab samajhte haiñ aur sab chup haiñ

koī kahtā nahīñ ki tum se kaheñ

kis se pūchheñ ki vasl meñ kyā hai

hijr meñ kyā nahīñ ki tum se kaheñ

ab 'ḳhizāñ' ye bhī kah nahīñ sakte

tum ne pūchhā nahīñ ki tum se kaheñ

haal aisa nahin ki tum se kahen

ek jhagDa nahin ki tum se kahen

zer-e-lab aah bhi muhaal hui

dard itna nahin ki tum se kahen

tum zuleKHa nahin ki hum se kaho

hum masiha nahin ki tum se kahen

sab samajhte hain aur sab chup hain

koi kahta nahin ki tum se kahen

kis se puchhen ki wasl mein kya hai

hijr mein kya nahin ki tum se kahen

ab 'KHizan' ye bhi kah nahin sakte

tum ne puchha nahin ki tum se kahen