haal-e-dil sunane mein umr bit jati hai

hāl-e-dil sunāne meñ umr biit jaatī hai

dil meñ ghar banāne meñ umr biit jaatī hai

yuuñ to roz kahte haiñ un ko bhuul jā.eñge

haañ magar bhulāne meñ umr biit jaatī hai

yuuñ to muskurāne ko roz muskurāte haiñ

khul ke muskurāne meñ umr biit jaatī hai

zindagī hamesha jab tīrgī kī zad meñ ho

sham.a ik jalāne meñ umr biit jaatī hai

shauq-e-justujū meñ ham lā-makāñ se guzre haiñ

ḳhud ko āzmāne meñ umr biit jaatī hai

is liye nahīñ karte un se koī va.ada ham

va.ade ke nibhāne meñ umr biit jaatī hai

maut zindagī meñ kuchh fāsla nahīñ lekin

phir bhī aane jaane meñ umr biit jaatī hai

tinkā tinkā joḌā hai ham ne rāt-din 'aḳhtar'

āshiyāñ sajāne meñ umr biit jaatī hai

haal-e-dil sunane mein umr bit jati hai

dil mein ghar banane mein umr bit jati hai

yun to roz kahte hain un ko bhul jaenge

han magar bhulane mein umr bit jati hai

yun to muskurane ko roz muskuraate hain

khul ke muskurane mein umr bit jati hai

zindagi hamesha jab tirgi ki zad mein ho

shama ek jalane mein umr bit jati hai

shauq-e-justuju mein hum la-makan se guzre hain

KHud ko aazmane mein umr bit jati hai

is liye nahin karte un se koi wada hum

wade ke nibhane mein umr bit jati hai

maut zindagi mein kuchh fasla nahin lekin

phir bhi aane jaane mein umr bit jati hai

tinka tinka joDa hai hum ne raat-din 'aKHtar'

aashiyan sajaane mein umr bit jati hai