haal-e-dil wo puchhne aane lage

hāl-e-dil vo pūchhne aane lage

marne vaale zindagī paane lage

koī batlā.e mile kaise qarār

har taraf jab tum nazar aane lage

chheḌā kyā afsāna tum ne pyaar kā

ham bhī qisse kal ke dohrāne lage

husn kā chāhā raqīboñ se bayāñ

bolte kyā ḳhaak haklāne lage

hai maraz āñkhoñ ko lāhaq jāniye

jab burā.ī bas nazar aane lage

niiñd par bhī lag ga.iiñ pābandiyāñ

jab se ḳhvāboñ meñ huzūr aane lage

rāteñ to ho jaatī thiiñ aksar garāñ

din ke hisse meñ bhī ġham aane lage

ishq hai jānam tijārat ye nahīñ

fā.ede kā kyuuñ ḳhayāl aane lage

shāyad ho jaa.e falak ab mehrbāñ

soch kar ham dil ko bahlāne lage

haal-e-dil wo puchhne aane lage

marne wale zindagi pane lage

koi batlae mile kaise qarar

har taraf jab tum nazar aane lage

chheDa kya afsana tum ne pyar ka

hum bhi qisse kal ke dohrane lage

husn ka chaha raqibon se bayan

bolte kya KHak haklane lage

hai maraz aankhon ko lahaq jaaniye

jab burai bas nazar aane lage

nind par bhi lag gain pabandiyan

jab se KHwabon mein huzur aane lage

raaten to ho jati thin aksar garan

din ke hisse mein bhi gham aane lage

ishq hai jaanam tijarat ye nahin

faede ka kyun KHayal aane lage

shayad ho jae falak ab mehrban

soch kar hum dil ko bahlane lage