hai dil mein KHayal-e-gul-e-ruKHsar kisi ka

hai dil meñ ḳhayāl-e-gul-e-ruḳhsār kisī kā

dāġhoñ siiñ mohabbat ke hai gulzār kisī kā

jaatā hai mirā jaan nipaT pyaas lagī hai

mañgtā huuñ zarā sharbat-e-dīdār kisī kā

sab par hai karam mujh pe sitam kyā hai do-rañgī

dildār kisī kā hai dil-āzār kisī kā

zanjīr bhalī qaid bhalī maut bhī jyūñ-tyūñ

pan haq na kare kis kuuñ giraftār kisī kā

maiñ huuñ to divāna pa kisī zulf kā na.iiñ huuñ

vallāh ki rakhtā nahīñ yak taar kisī kā

yak dam to ham-āġhosh karo ai gul-e-ḳhūbī

ho jā.ūñgā ab na.iiñ to gale haar kisī kā

jhuktā hai zarā baad ke chalne meñ zamīñ par

nargis hai magar baaġh hai bīmār kisī kā

laatī hai ḳhabar yaar kī mauj-e-dam-e-shamshīr

kaarī hai magar dil meñ mire vaar kisī kā

har raat 'sirāj' ātish-e-ġham meñ na jale kyuuñ

parvāna-e-jāñ-soz hai balhār kisī kā

hai dil mein KHayal-e-gul-e-ruKHsar kisi ka

daghon sin mohabbat ke hai gulzar kisi ka

jata hai mera jaan nipaT pyas lagi hai

mangta hun zara sharbat-e-didar kisi ka

sab par hai karam mujh pe sitam kya hai do-rangi

dildar kisi ka hai dil-azar kisi ka

zanjir bhali qaid bhali maut bhi jyun-tyun

pan haq na kare kis kun giraftar kisi ka

main hun to diwana pa kisi zulf ka nain hun

wallah ki rakhta nahin yak tar kisi ka

yak dam to ham-aghosh karo ai gul-e-KHubi

ho jaunga ab nain to gale haar kisi ka

jhukta hai zara baad ke chalne mein zamin par

nargis hai magar bagh hai bimar kisi ka

lati hai KHabar yar ki mauj-e-dam-e-shamshir

kari hai magar dil mein mere war kisi ka

har raat 'siraj' aatish-e-gham mein na jale kyun

parwana-e-jaan-soz hai balhaar kisi ka