hai ghanimat ye fareb-e-shab-e-wada ai dil

hai ġhanīmat ye fareb-e-shab-e-va.ada ai dil

kyā koī degā tujhe is se ziyāda ai dil

muddatoñ jaan chhiḌakte rahe jis lams pe vo

oḌh kar aa gayā ḳhushbū kā labāda ai dil

soch zanjīr-ba-pā fikr hai pāband-e-rasan

kyā yahī sub.h-e-tamannā kā hai jaada ai dil

ab bhī raushan kiye baiThā hai ummīdoñ ke charāġh

kitnā ma.asūm hai tū kitnā hai saada ai dil

ḳhuuñ meñ luThḌe hue lāshe haiñ nuqūsh-e-kaf-e-pā

aur kar manzil-e-jānāñ kā irāda ai dil

ḳhud-farebī kā fusūñ tujh pe hai kaarī varna

kam nahīñ hai shab-e-ġham se shab-e-va.ada ai dil

hai ghanimat ye fareb-e-shab-e-wada ai dil

kya koi dega tujhe is se ziyaada ai dil

muddaton jaan chhiDakte rahe jis lams pe wo

oDh kar aa gaya KHushbu ka labaada ai dil

soch zanjir-ba-pa fikr hai paband-e-rasan

kya yahi subh-e-tamanna ka hai jada ai dil

ab bhi raushan kiye baiTha hai ummidon ke charagh

kitna masum hai tu kitna hai sada ai dil

KHun mein luThDe hue lashe hain nuqush-e-kaf-e-pa

aur kar manzil-e-jaanan ka irada ai dil

KHud-farebi ka fusun tujh pe hai kari warna

kam nahin hai shab-e-gham se shab-e-wada ai dil