hai wahi marka-e-neki-o-shar mere baad

hai vahī mārka-e-nekī-o-shar mere ba.ad

tham na jaa.eñ kahīñ yārān-e-safar mere ba.ad

kam haiñ aise jo kareñ arz-e-hunar mere ba.ad

aaj ġhamnāk se haiñ ahl-e-nazar mere ba.ad

chand saa.at ke liye ruk bhī gayā ro bhī liyā

kārvāñ phir bhī hai sargarm-e-safar mere ba.ad

jazb thiiñ jis meñ mire ḳhūn-e-vafā kī chhīñTeñ

ban gayā sajda-gah-e-ḳhalq vo dar mere ba.ad

hijr kī raat laraztā hī rahā palkoñ par

qatra-e-ashk banā najm-e-sahar mere ba.ad

shāyad ai dost tamāshāoñ ke hañgāmoñ meñ

yaad aa.e mirī mohtāt nazar mere ba.ad

aaj anjān bano bhuul bhī jaao lekin

kyā karoge mirī yaad aa.e agar mere ba.ad

kyuuñ bichhāte ho mirī raah meñ kāñTe yaaro

ḳhair jaarī se badal jā.egā shar mere ba.ad

ab bhī shor-e-qadam-e-rāh-ravāñ hai to vahī

phir bhī suunī hai tirī rāhguzar mere ba.ad

kyā koī aur banātā thā nasheman apnā

phir usī shāḳh pe hai raqs-e-sharar mere ba.ad

ik mirī yaad kī mash.al ke sivā kuchh bhī na ho

raat is tarah se bhī hogī basar mere ba.ad

ye tamavvuj ye talātum ye shahādat ye shuhūd

ḳhatm hai manzil-e-avval kā safar mere ba.ad

ashk āñkhoñ meñ bhare us ne bhī dekhā 'zaidī'

aaj mahfil ko ba-andāz-e-digar mere ba.ad

hai wahi marka-e-neki-o-shar mere baad

tham na jaen kahin yaran-e-safar mere baad

kam hain aise jo karen arz-e-hunar mere baad

aaj ghamnak se hain ahl-e-nazar mere baad

chand saat ke liye ruk bhi gaya ro bhi liya

karwan phir bhi hai sargarm-e-safar mere baad

jazb thin jis mein mere KHun-e-wafa ki chhinTen

ban gaya sajda-gah-e-KHalq wo dar mere baad

hijr ki raat larazta hi raha palkon par

qatra-e-ashk bana najm-e-sahar mere baad

shayad ai dost tamashaon ke hangamon mein

yaad aae meri mohtat nazar mere baad

aaj anjaan bano bhul bhi jao lekin

kya karoge meri yaad aae agar mere baad

kyun bichhate ho meri rah mein kanTe yaro

KHair jari se badal jaega shar mere baad

ab bhi shor-e-qadam-e-rah-rawan hai to wahi

phir bhi suni hai teri rahguzar mere baad

kya koi aur banata tha nasheman apna

phir usi shaKH pe hai raqs-e-sharar mere baad

ek meri yaad ki mashal ke siwa kuchh bhi na ho

raat is tarah se bhi hogi basar mere baad

ye tamawwuj ye talatum ye shahadat ye shuhud

KHatm hai manzil-e-awwal ka safar mere baad

ashk aankhon mein bhare us ne bhi dekha 'zaidi'

aaj mahfil ko ba-andaz-e-digar mere baad