hain ahl-e-chaman hairan ye kaisi bahaar aai

haiñ ahl-e-chaman hairāñ ye kaisī bahār aa.ī

haiñ phuul khile lekin hai rañg na ra.anā.ī

un ke ruḳh-e-rañgīñ se is sā.ad-e-sīmīñ se

phūloñ ne phaban paa.ī sūraj ne ziyā paa.ī

sab mai-kade vīrāñ haiñ sunsān gulistāñ haiñ

kahne ko ghaTā chhā.ī kahne ko bahār aa.ī

madhoshī-o-mastī kā andāz nirālā hai

mai rindoñ ne pī kam hī paimānoñ se chhalkā.ī

tanhā.ī meñ rah kar bhī tanhā nahīñ hote ham

tanhā.ī meñ yādoñ kī jab chaltī hai purvā.ī

is daur meñ jiinā bhī kuchh kam nahīñ marne se

nā-karda gunāhoñ kī jaise ho sazā paa.ī

hañste hue marne ko tayyār jo rahte haiñ

aise hī jiyāloñ ne jiine kī adā paa.ī

is daur ke insāñ kā andāz nirālā hai

apne ko adū samjheñ ġhairoñ se shanāsā.ī

hain ahl-e-chaman hairan ye kaisi bahaar aai

hain phul khile lekin hai rang na ranai

un ke ruKH-e-rangin se is saad-e-simin se

phulon ne phaban pai suraj ne ziya pai

sab mai-kade viran hain sunsan gulistan hain

kahne ko ghaTa chhai kahne ko bahaar aai

madhoshi-o-masti ka andaz nirala hai

mai rindon ne pi kam hi paimanon se chhalkai

tanhai mein rah kar bhi tanha nahin hote hum

tanhai mein yaadon ki jab chalti hai purwai

is daur mein jina bhi kuchh kam nahin marne se

na-karda gunahon ki jaise ho saza pai

hanste hue marne ko tayyar jo rahte hain

aise hi jiyalon ne jine ki ada pai

is daur ke insan ka andaz nirala hai

apne ko adu samjhen ghairon se shanasai