hain na zindon mein na murdon mein kamar ke aashiq

haiñ na zindoñ meñ na murdoñ meñ kamar ke āshiq

na idhar ke haiñ ilāhī na udhar ke āshiq

hai vahī aañkh jo mushtāq tire diid kī ho

kaan vo haiñ jo raheñ terī ḳhabar ke āshiq

jitne nāvak haiñ kamāñ-dār tire tarkash meñ

kuchh mire dil ke haiñ kuchh mere jigar ke āshiq

barhaman dair se ka.abe se phir aa.e haajī

tere dar se na saraknā thā na sarke āshiq

aañkh dikhlāo unheñ marte hoñ jo āñkhoñ par

ham to haiñ yaar mohabbat kī nazar ke āshiq

chhup rahe hoñge nazar se kahīñ anqā kī tarah

tauba kiije kahīñ marte haiñ kamar ke āshiq

be-jigar ma.arka-e-ishq meñ kyā Thahreñge

khāte haiñ ḳhanjar-e-ma.ashūq ke charke āshiq

tujh ko ka.aba ho mubārak dil-e-vīrāñ ham ko

ham haiñ zāhid usī ujḌe hue ghar ke āshiq

kyā huā letī haiñ pariyāñ jo balā.eñ terī

ki parī-zād bhī hote haiñ bashar ke āshiq

be-kasī dard-o-alam daaġh tamannā hasrat

chhoḌe jaate haiñ pas-e-marg ye tarke āshiq

be-sabab sair-e-shab-e-māh nahīñ hai ye 'amīr'

ho ga.e tum bhī kisī rashk-e-qamar ke āshiq

hain na zindon mein na murdon mein kamar ke aashiq

na idhar ke hain ilahi na udhar ke aashiq

hai wahi aankh jo mushtaq tere did ki ho

kan wo hain jo rahen teri KHabar ke aashiq

jitne nawak hain kaman-dar tere tarkash mein

kuchh mere dil ke hain kuchh mere jigar ke aashiq

barhaman dair se kabe se phir aae haji

tere dar se na sarakna tha na sarke aashiq

aankh dikhlao unhen marte hon jo aankhon par

hum to hain yar mohabbat ki nazar ke aashiq

chhup rahe honge nazar se kahin anqa ki tarah

tauba kije kahin marte hain kamar ke aashiq

be-jigar marka-e-ishq mein kya Thahrenge

khate hain KHanjar-e-mashuq ke charke aashiq

tujh ko kaba ho mubarak dil-e-viran hum ko

hum hain zahid usi ujDe hue ghar ke aashiq

kya hua leti hain pariyan jo balaen teri

ki pari-zad bhi hote hain bashar ke aashiq

be-kasi dard-o-alam dagh tamanna hasrat

chhoDe jate hain pas-e-marg ye tarke aashiq

be-sabab sair-e-shab-e-mah nahin hai ye 'amir'

ho gae tum bhi kisi rashk-e-qamar ke aashiq