hain nikhat-e-gul bagh mein ai baad-e-saba hum

haiñ nik.hat-e-gul baaġh meñ ai bād-e-sabā ham

dam bhar meñ numūdār haiñ dam bhar meñ fanā ham

tashrīf to le aa.eñ vo rūThe raheñ ham se

jhagḌā to miTe sulh bhī ho jā.egī bāham

ham tere shanāsā haiñ hameñ ġhair se kyā kaam

āgāh kisī se bhī nahīñ tere sivā ham

pūchhā thā ye maiñ ne ki miTā.egā mujhe kaun

qismat abhī ḳhāmosh thī jo us ne kahā ham

vo kahte haiñ da.avā hai use hosh-o-ḳhirad kā

'beḳhud' ko pilā.eñge mai-e-hosh-rubā ham

hain nikhat-e-gul bagh mein ai baad-e-saba hum

dam bhar mein numudar hain dam bhar mein fana hum

tashrif to le aaen wo ruThe rahen hum se

jhagDa to miTe sulh bhi ho jaegi baham

hum tere shanasa hain hamein ghair se kya kaam

aagah kisi se bhi nahin tere siwa hum

puchha tha ye main ne ki miTaega mujhe kaun

qismat abhi KHamosh thi jo us ne kaha hum

wo kahte hain dawa hai use hosh-o-KHirad ka

'beKHud' ko pilaenge mai-e-hosh-ruba hum