hairat mein thi nazar sar-e-bazar-e-aina

hairat meñ thī nazar sar-e-bāzār-e-ā.ina

ik aa.ina thā ḳhud hī ḳharīdār-e-ā.ina

vo ā.ina-sifat sar-e-dīvār bhī hai ḳhud

hai sar-ba-sar vahī pas-e-dīvār-e-ā.ina

bas ahl-e-zarf hī ko ijāzat hai diid kī

har aañkh ke liye nahīñ dīdār-e-ā.ina

har dam vo misl-e-ā.ina shaffāf hī rahā

dhuñdlā na paayā koī talabgār-e-ā.ina

haq-go hai sar-basar vo haqīqat-shanās hai

zāhir har ik bashar pe hai kirdār-e-ā.ina

hai us ke aage auj-e-surayyā bhī sar-nigūñ

kuchh is qadar buland hai me'yār-e-ā.ina

hogā qadam qadam pe vo duniyā meñ surḳh-rū

rusvā na hogā koī vafādār-e-ā.ina

'rā'nā' jo saaf aa.ina dil kā rakhe koī

paa.e vahī jazā sar-e-darbār-e-ā.ina

hairat mein thi nazar sar-e-bazar-e-aina

ek aaina tha KHud hi KHaridar-e-aina

wo aaina-sifat sar-e-diwar bhi hai KHud

hai sar-ba-sar wahi pas-e-diwar-e-aina

bas ahl-e-zarf hi ko ijazat hai did ki

har aankh ke liye nahin didar-e-aina

har dam wo misl-e-aina shaffaf hi raha

dhundla na paya koi talabgar-e-aina

haq-go hai sar-basar wo haqiqat-shanas hai

zahir har ek bashar pe hai kirdar-e-aina

hai us ke aage auj-e-surayya bhi sar-nigun

kuchh is qadar buland hai me'yar-e-aina

hoga qadam qadam pe wo duniya mein surKH-ru

ruswa na hoga koi wafadar-e-aina

'ra'na' jo saf aaina dil ka rakhe koi

pae wahi jaza sar-e-darbar-e-aina