حیرت میں تھی نظر سر بازار آئنہ

حیرت میں تھی نظر سر بازار آئنہ

اک آئنہ تھا خود ہی خریدار آئنہ

وہ آئنہ صفت سر دیوار بھی ہے خود

ہے سر بسر وہی پس دیوار آئنہ

بس اہل ظرف ہی کو اجازت ہے دید کی

ہر آنکھ کے لیے نہیں دیدار آئنہ

ہر دم وہ مثل آئنہ شفاف ہی رہا

دھندلا نہ پایا کوئی طلب گار آئنہ

حق گو ہے سربسر وہ حقیقت شناس ہے

ظاہر ہر اک بشر پہ ہے کردار آئنہ

ہے اس کے آگے اوج ثریا بھی سرنگوں

کچھ اس قدر بلند ہے معیار آئنہ

ہوگا قدم قدم پہ وہ دنیا میں سرخ رو

رسوا نہ ہوگا کوئی وفادار آئنہ

رعناؔ جو صاف آئنہ دل کا رکھے کوئی

پائے وہی جزا سر دربار آئنہ