halqa-e-eatibar mein kab the

halqa-e-e.atibār meñ kab the

ham kisī ke shumār meñ kab the

ġhāza-pur-fareb kyā kartā

aa.ine iḳhtiyār meñ kab the

sāmnā aur ham faqīroñ kā

hausle shahryār meñ kab the

jashn-e-ruḳhsat hai shahr meñ jin kā

vo amān-e-hisār meñ kab the

dastakeñ nā-murād hī lauTīñ

vo mire intizār meñ kab the

boltī kyoñ nahīñ ye zanjīreñ

ye qadam kū-e-yār meñ kab the

ham se shā.ir 'majāz' pahle bhī

sarnavisht-e-dayār meñ kab the

halqa-e-eatibar mein kab the

hum kisi ke shumar mein kab the

ghaza-pur-fareb kya karta

aaine iKHtiyar mein kab the

samna aur hum faqiron ka

hausle shahryar mein kab the

jashn-e-ruKHsat hai shahr mein jin ka

wo aman-e-hisar mein kab the

dastaken na-murad hi lauTin

wo mere intizar mein kab the

bolti kyon nahin ye zanjiren

ye qadam ku-e-yar mein kab the

hum se shair 'majaz' pahle bhi

sarnawisht-e-dayar mein kab the