hum ghar hi mein rahte to tamasha to na hote

ham ghar hī meñ rahte to tamāshā to na hote

yuuñ kushta-e-be-dād-e-zamāna to na hote

ġham-e-dil pe shikast-e-talab-e-jāñ kā hai bhārī

miT jaate tag-o-tāz meñ paspā to na hote

kho jaate kisī bādiya-e-haft-balā meñ

ḳhilqat meñ magar rāñda-e-duniyā to na hote

duniyā se jo rakhte kabhī duniyā se ravābit

apne hī zamāne meñ yuuñ tanhā to na hote

ho rahte haram ke to jiye jaate sukūñ se

badnām-e-rah-e-dair-o-kalīsā to na hote

āvāra-mizājī kī sazā ḳhuub thī lekin

pā-basta-e-ḳhāk-e-lab-e-dariyā to na hote

jiite haiñ to sab khul ga.e ausāf jahāñ par

mar jaate to achchhā thā ki rusvā to na hote

ūñchā jo uThā rakhte alam apnī anā kā

a.alā na sahī arsh pe adnā to na hote

hum ghar hi mein rahte to tamasha to na hote

yun kushta-e-be-dad-e-zamana to na hote

gham-e-dil pe shikast-e-talab-e-jaan ka hai bhaari

miT jate tag-o-taz mein paspa to na hote

kho jate kisi baadiya-e-haft-bala mein

KHilqat mein magar randa-e-duniya to na hote

duniya se jo rakhte kabhi duniya se rawabit

apne hi zamane mein yun tanha to na hote

ho rahte haram ke to jiye jate sukun se

badnam-e-rah-e-dair-o-kalisa to na hote

aawara-mizaji ki saza KHub thi lekin

pa-basta-e-KHak-e-lab-e-dariya to na hote

jite hain to sab khul gae ausaf jahan par

mar jate to achchha tha ki ruswa to na hote

uncha jo uTha rakhte alam apni ana ka

aala na sahi arsh pe adna to na hote