hum jo jannat se nikale gae fitna karte

ham jo jannat se nikāle ga.e fitna karte

hukm terā hai to lauT ā.eñge sajda karte

ab tujhe roz na sochūñ to badan TūTtā hai

'umr guzrī hai tirī yaad kā nashsha karte

mā'raka 'ishq kī hurmat kā ho yā badr kā ho

hālat-e-jang meñ rishte nahīñ dekhā karte

ham na hote to koī aur mohabbat kartā

tū na hotā bhī to ham terī tamannā karte

tere dīdār ke lamhāt bahut qīmtī the

ham agar aañkh jhapakte to ḳhasārā karte

jaane vāloñ ko sadā.eñ nahīñ dete 'sāgar'

ashk vāpas nahīñ āñkhoñ meñ samāyā karte

hum jo jannat se nikale gae fitna karte

hukm tera hai to lauT aaenge sajda karte

ab tujhe roz na sochun to badan TuTta hai

'umr guzri hai teri yaad ka nashsha karte

ma'raka 'ishq ki hurmat ka ho ya badr ka ho

haalat-e-jang mein rishte nahin dekha karte

hum na hote to koi aur mohabbat karta

tu na hota bhi to hum teri tamanna karte

tere didar ke lamhat bahut qimti the

hum agar aankh jhapakte to KHasara karte

jaane walon ko sadaen nahin dete 'sagar'

ashk wapas nahin aankhon mein samaya karte