hum ki KHamosh hue ahl-e-bayan dekhte hain

ham ki ḳhāmosh hue ahl-e-bayāñ dekhte haiñ

raaz andāz-e-takallum se ayaañ dekhte haiñ

jān-levā hai fareb-e-rah-e-gulzār-talab

nashtar-e-shauq qarīb-e-rag-e-jāñ dekhte haiñ

hai usī ghar meñ kahīñ gauhar-e-ummīd nihāñ

sū-e-vīrāna-e-dil bahr-e-amāñ dekhte haiñ

kaise bantā hai lahū surḳhī-e-afsāna-e-dil

kaise bantā hai qalam nok-e-sināñ dekhte haiñ

ātish-e-shauq ko rakhte haiñ ba-har-taur javāñ

ḳhāk-e-gulshan meñ zar-e-gul ke nishāñ dekhte haiñ

ḳhashmagīñ aaj vo yuuñ haiñ ki nahīñ tāb-e-suḳhan

'arsh' ham aaj tirā zor-e-bayāñ dekhte haiñ

hum ki KHamosh hue ahl-e-bayan dekhte hain

raaz andaz-e-takallum se ayan dekhte hain

jaan-lewa hai fareb-e-rah-e-gulzar-talab

nashtar-e-shauq qarib-e-rag-e-jaan dekhte hain

hai usi ghar mein kahin gauhar-e-ummid nihan

su-e-virana-e-dil bahr-e-aman dekhte hain

kaise banta hai lahu surKHi-e-afsana-e-dil

kaise banta hai qalam nok-e-sinan dekhte hain

aatish-e-shauq ko rakhte hain ba-har-taur jawan

KHak-e-gulshan mein zar-e-gul ke nishan dekhte hain

KHashmagin aaj wo yun hain ki nahin tab-e-suKHan

'arsh' hum aaj tera zor-e-bayan dekhte hain