hum kitne diwane the jo humne tujhko phul kaha

ham kitne dīvāne the jo ham ne tujh ko phuul kahā

phūloñ ne to ḳhud ko har-dam tere paañv kī dhuul kahā

tujh se to kuchh kah na sake ham par tujh ko itnā chāhā

jo terā ḳhat le kar aaya ham ne use rasūl kahā

ham ko apnī jaan to itnī thī hī nahīñ aziiz kabhī

jānāñ tum ko jaan to ham ne bas hasb-e-ma.amūl kahā

sab ne ḳhudā ke paḌhe qasīde dhan daulat duniyā māñgī

ham to mast qalandar haiñ so ham ne ūl-julūl kahā

jab tak tum the saath hameñ ye duniyā chandan kahtī thī

tum jo ga.e to hameñ jahāñ ne kīkar niim babūl kahā

merā aur zamāne kā bas itnā hī to jhagḌā hai

sab ġhalatī kahte haiñ jis ko maiñ ne use usuul kahā

har Thokar se chalnā sīkhā har dhoke se liyā sabaq

to kyā ġhalat kahā jo ham ne yāroñ ko schōl kahā

ham ko rusvā kar ke us ne shohrat ḳhuub kamā.ī hai

ham us ke bhī kaam aa.e haiñ jis ne hameñ fuzūl kahā

ham kitne bhī ġhalat the lekin lafz hamesha chune sahīh

ḳhud ko nā-māqūl bhī ham ne agar kahā ma.aqūl kahā

hum kitne diwane the jo hum ne tujh ko phul kaha

phulon ne to KHud ko har-dam tere panw ki dhul kaha

tujh se to kuchh kah na sake hum par tujh ko itna chaha

jo tera KHat le kar aaya hum ne use rasul kaha

hum ko apni jaan to itni thi hi nahin aziz kabhi

jaanan tum ko jaan to hum ne bas hasb-e-mamul kaha

sab ne KHuda ke paDhe qaside dhan daulat duniya mangi

hum to mast qalandar hain so hum ne ul-julul kaha

jab tak tum the sath hamein ye duniya chandan kahti thi

tum jo gae to hamein jahan ne kikar nim babul kaha

mera aur zamane ka bas itna hi to jhagDa hai

sab ghalati kahte hain jis ko main ne use usul kaha

har Thokar se chalna sikha har dhoke se liya sabaq

to kya ghalat kaha jo hum ne yaron ko school kaha

hum ko ruswa kar ke us ne shohrat KHub kamai hai

hum us ke bhi kaam aae hain jis ne hamein fuzul kaha

hum kitne bhi ghalat the lekin lafz hamesha chune sahih

KHud ko na-maqul bhi hum ne agar kaha maqul kaha