hum ko ye Dar hai ki imkan kisi aur ka hai

ham ko ye Dar hai ki imkān kisī aur kā hai

ya.anī vo shaḳhs nigahbān kisī aur kā hai

ye jo har lahza dhaḌakte haiñ mire siine meñ

dil kisī aur kā armān kisī aur kā hai

ġhā.ebāna yahī samjhā vo faqat merā hai

jab milā to lagā nādān kisī aur kā hai

dastakeñ sun ke hī andāza huā thā ham ko

vo hamārā nahīñ mehmān kisī aur kā hai

hākim-e-shām kī bai.at se khulā hai mujh par

taḳht par ma.anī-e-qur.ān kisī aur kā hai

ham musāfir haiñ to jaanā hai kahīñ aur hameñ

ghar kisī aur kā sāmān kisī aur kā hai

ham yūñhī qarz chukāte rahe anjāne meñ

kaash ham jānte tāvān kisī aur kā hai

bāñdh kar sar pe kafan kuud paḌe haiñ jis meñ

jañg hai ġhair kī maidān kisī aur kā hai

ruḳh vo rakhtā hai ba-zāhir mirī jānib lekin

vo to merā nahīñ sultān kisī aur kā hai

maiñ huuñ nā-ḳhush ki ḳhizāñ aan paḌī hai be-vaqt

bāġhbāñ ḳhush hai ki nuqsān kisī aur kā hai

umr-bhar ham ne pilāyā hai jinheñ apnā lahū

vo bahāreñ vo gulistān kisī aur kā hai

ye makāñ kis kī virāsat hai hameñ kyā mālūm

sahn apnā hai to dālān kisī aur kā hai

sehn-e-gulshan se nikal jaane kā merā shāhā

maiñ samajhtā rahā elaan kisī aur kā hai

kārvāñ luTne kā us ko to nahīñ dard 'nabīl'

vo samajhtā hai ki nuqsān kisī aur kā hai

yuuñ bhī mahrūm haiñ ham rañg se ḳhushbū se 'nabīl'

phuul apne haiñ to gul-dān kisī aur kā hai

hum ko ye Dar hai ki imkan kisi aur ka hai

yani wo shaKHs nigahban kisi aur ka hai

ye jo har lahza dhaDakte hain mere sine mein

dil kisi aur ka arman kisi aur ka hai

ghaebana yahi samjha wo faqat mera hai

jab mila to laga nadan kisi aur ka hai

dastaken sun ke hi andaza hua tha hum ko

wo hamara nahin mehman kisi aur ka hai

hakim-e-sham ki baiat se khula hai mujh par

taKHt par mani-e-quran kisi aur ka hai

hum musafir hain to jaana hai kahin aur hamein

ghar kisi aur ka saman kisi aur ka hai

hum yunhi qarz chukate rahe anjaane mein

kash hum jaante tawan kisi aur ka hai

bandh kar sar pe kafan kud paDe hain jis mein

jang hai ghair ki maidan kisi aur ka hai

ruKH wo rakhta hai ba-zahir meri jaanib lekin

wo to mera nahin sultan kisi aur ka hai

main hun na-KHush ki KHizan aan paDi hai be-waqt

baghban KHush hai ki nuqsan kisi aur ka hai

umr-bhar hum ne pilaya hai jinhen apna lahu

wo bahaaren wo gulistan kisi aur ka hai

ye makan kis ki wirasat hai hamein kya malum

sahn apna hai to dalan kisi aur ka hai

sehn-e-gulshan se nikal jaane ka mera shaha

main samajhta raha elan kisi aur ka hai

karwan luTne ka us ko to nahin dard 'nabil'

wo samajhta hai ki nuqsan kisi aur ka hai

yun bhi mahrum hain hum rang se KHushbu se 'nabil'

phul apne hain to gul-dan kisi aur ka hai