humne kahna hai jo nahin kahte

ham ne kahnā hai jo nahīñ kahte

aap kahte haiñ lo nahīñ kahte

aap ko bevafā kaheñ aur ham

kahnā bantā hai go nahīñ kahte

kis ko kahte ki suniye hāl-e-dil

ham agar aap ko nahīñ kahte

aap ke baare meñ mire ash'ār

vo bhī kahte haiñ jo nahīñ kahte

vo jo kahte haiñ dil nahīñ samjhā

jo samajhtā hai vo nahīñ kahte

ik ġhazal jo kahī nahīñ ham ne

aap kahte haiñ so nahīñ kahte

roz kahte haiñ ham kaheñ tum se

jaane kyā hai ki jo nahīñ kahte

aap se guftugū bahāna hai

ham koī she'r to nahīñ kahte

dil mile hoñ to do nufūs ko log

ek kahte haiñ do nahīñ kahte

jo kahā hai vo kahlvāyā gayā

ham koī aap to nahīñ kahte

aap bainassutūr paḌhiye to

ham jo kahte haiñ vo nahīñ kahte

aap se tum hue zamāna huā

aap ko aap to nahīñ kahte

bevafā.ī kare bhī to 'sāgar'

bevafā yaar ko nahīñ kahte

hum ne kahna hai jo nahin kahte

aap kahte hain lo nahin kahte

aap ko bewafa kahen aur hum

kahna banta hai go nahin kahte

kis ko kahte ki suniye haal-e-dil

hum agar aap ko nahin kahte

aap ke bare mein mere ash'ar

wo bhi kahte hain jo nahin kahte

wo jo kahte hain dil nahin samjha

jo samajhta hai wo nahin kahte

ek ghazal jo kahi nahin hum ne

aap kahte hain so nahin kahte

roz kahte hain hum kahen tum se

jaane kya hai ki jo nahin kahte

aap se guftugu bahana hai

hum koi she'r to nahin kahte

dil mile hon to do nufus ko log

ek kahte hain do nahin kahte

jo kaha hai wo kahlwaya gaya

hum koi aap to nahin kahte

aap bainassutur paDhiye to

hum jo kahte hain wo nahin kahte

aap se tum hue zamana hua

aap ko aap to nahin kahte

bewafai kare bhi to 'sagar'

bewafa yar ko nahin kahte