humne likkhe the hawaon mein fasane apne

ham ne likkhe the havāoñ meñ fasāne apne

uḌ ga.e ek hī jhoñke meñ zamāne apne

suunī āñkhoñ meñ talāsho na vafā ke motī

ham luTā aa.e kahīñ aur ḳhazāne apne

band palkoñ pe ye kis dard ne dastak dī hai

TuuT jaa.eñ na kahīñ ḳhvāb suhāne apne

ham darīche pe khaḌe ho ke kahāñ tak socheñ

chāñd har roz badaltā hai Thikāne apne

kaun parvāna bane kaun jale kis ke liye

sham.a ḳhud baiTh ke ab ro.e sirhāne apne

ham ne toḌā nahīñ maazī se ta'alluq 'qaisar'

har na.e sher meñ aañsū haiñ purāne apne

hum ne likkhe the hawaon mein fasane apne

uD gae ek hi jhonke mein zamane apne

suni aankhon mein talasho na wafa ke moti

hum luTa aae kahin aur KHazane apne

band palkon pe ye kis dard ne dastak di hai

TuT jaen na kahin KHwab suhane apne

hum dariche pe khaDe ho ke kahan tak sochen

chand har roz badalta hai Thikane apne

kaun parwana bane kaun jale kis ke liye

shama KHud baiTh ke ab roe sirhane apne

hum ne toDa nahin mazi se ta'alluq 'qaisar'

har nae sher mein aansu hain purane apne