humne to bain mein nauhe mein sada-kari ki

ham ne to bain meñ nauhe meñ sadā-kārī kī

aaj dafnā dī hai mayyat bhī ravā-dārī kī

ham se bad-tar koī fankār jahāñ meñ hogā

ham adā-kāriyāñ karte haiñ adākārī kī

ham ne ġhairat kā baġhāvat kā alāpā dīpak

taan ūñchī hai magar aaj bhī darbārī kī

ham ko saa.e se bhī shāhoñ ke bachā kar rakhnā

ham pe aa jaa.e na tohmat bhī taraf-dārī kī

vo na māneñge ki ye ain ḳhatā hai un kī

vo jo yaarī ko bhī kahte haiñ ki 'ayyārī kī

ham to anjān the is ghar meñ hamārā kyā thā

tum to timsāl the duniyā meñ samajhdārī kī

jin se uThtī thiiñ siyah aag kī lapTeñ har dam

ham ne aisī bhī zamīnoñ meñ shajar-kārī kī

tum ko sote meñ bhī kab aañkh uThā kar dekhā

ham ne ḳhvāboñ meñ bhī āñkhoñ kī nigah-dārī kī

hum ne to bain mein nauhe mein sada-kari ki

aaj dafna di hai mayyat bhi rawa-dari ki

hum se bad-tar koi fankar jahan mein hoga

hum ada-kariyan karte hain adakari ki

hum ne ghairat ka baghawat ka alapa dipak

tan unchi hai magar aaj bhi darbari ki

hum ko sae se bhi shahon ke bacha kar rakhna

hum pe aa jae na tohmat bhi taraf-dari ki

wo na manenge ki ye ain KHata hai un ki

wo jo yari ko bhi kahte hain ki 'ayyari ki

hum to anjaan the is ghar mein hamara kya tha

tum to timsal the duniya mein samajhdari ki

jin se uThti thin siyah aag ki lapTen har dam

hum ne aisi bhi zaminon mein shajar-kari ki

tum ko sote mein bhi kab aankh uTha kar dekha

hum ne KHwabon mein bhi aankhon ki nigah-dari ki