hamare samne begana-war aao nahin

hamāre sāmne begāna-vār aao nahīñ

niyāz-e-ahl-e-mohabbat ko āzmāo nahīñ

hameñ bhī apnī tabāhī pe rañj hotā hai

hamāre hāl-e-pareshāñ pe muskurāo nahīñ

jo taar TuuT ga.e haiñ vo jaḌ nahīñ sakte

karam kī aas na do baat ko baḌhāo nahīñ

diye ḳhulūs-o-mohabbat ke bujhte jaate haiñ

garāñ na ho to hameñ is qadar satāo nahīñ

dil-o-nigāh ko kab tak koī bichhā.e rahe

ye dekh kar ki udhar se koī jhukāv nahīñ

ye aur baat hai kāñToñ meñ jī bahal jaa.e

nahīñ ki lāla-o-gul se mujhe lagāv nahīñ

hamare samne begana-war aao nahin

niyaz-e-ahl-e-mohabbat ko aazmao nahin

hamein bhi apni tabahi pe ranj hota hai

hamare haal-e-pareshan pe muskurao nahin

jo tar TuT gae hain wo jaD nahin sakte

karam ki aas na do baat ko baDhao nahin

diye KHulus-o-mohabbat ke bujhte jate hain

garan na ho to hamein is qadar satao nahin

dil-o-nigah ko kab tak koi bichhae rahe

ye dekh kar ki udhar se koi jhukaw nahin

ye aur baat hai kanTon mein ji bahal jae

nahin ki lala-o-gul se mujhe lagaw nahin