hamein pata na chala KHun ki rawani mein

hameñ pata na chalā ḳhuun kī ravānī meñ

ki āñkheñ Dūbne vaalī haiñ kitne paanī meñ

hameñ to jur'a-e-ġham meñ jo kaif miltā hai

na mil sakegā kabhī jām-e-arġhavānī meñ

usī ne luuTe haiñ us but se guftugū ke maze

suḳhan kī daad milī jis ko be-zabānī meñ

abhī firāq kī manzil bhī aane vaalī hai

na bhuul jaa.eñ kahīñ fart-e-shādmānī meñ

tū shāhzādī pe yuuñ dāstāñ tamām na kar

abhī to kitne hī kirdār haiñ kahānī meñ

huā thā farsh pe ḳhurshīd koī jalva-fagan

mah-o-nujūm the har lamha pāsbānī meñ

'urūs-e-fan ko sañvāreñge aap ḳhaak 'suhail'

ki ek 'umr guzārī qasīda-ḳhvāni meñ

hamein pata na chala KHun ki rawani mein

ki aankhen Dubne wali hain kitne pani mein

hamein to jur'a-e-gham mein jo kaif milta hai

na mil sakega kabhi jam-e-arghawani mein

usi ne luTe hain us but se guftugu ke maze

suKHan ki dad mili jis ko be-zabani mein

abhi firaq ki manzil bhi aane wali hai

na bhul jaen kahin fart-e-shadmani mein

tu shahzadi pe yun dastan tamam na kar

abhi to kitne hi kirdar hain kahani mein

hua tha farsh pe KHurshid koi jalwa-fagan

mah-o-nujum the har lamha pasbani mein

'urus-e-fan ko sanwarenge aap KHak 'suhail'

ki ek 'umr guzari qasida-KHwani mein