hamesha dil mein jo apne KHayal-e-zulf-o-kakul hai

hamesha dil meñ jo apne ḳhayāl-e-zulf-o-kakul hai

to siine meñ nafas har ek mauj-e-bū-e-sumbul hai

fasāñ hai saḳht-jānī merī teġh-e-nāz-e-qātil ko

ki yaañ jitnā hai rañj-e-naza.a utnā vaañ taġhāful hai

mujhī ko kuchh tū apne kūche meñ aane nahīñ detā

vagarna ai sitam-ījād har gulshan meñ bulbul hai

tirī mīna-e-gardan kī sifat kī hai jo ai saaqī

mirī āvāz ko kahte haiñ sab āvāz-e-qulqul hai

vahī dil hai bharā ho nashsha jis meñ jām-e-vahdat kā

ki hai chhātī kā patthar bazm meñ shīsha jo be mul hai

mare jo soz-e-ġham se jal ke ho vo nek-nām āḳhir

charāġh-e-murdā ko aksar yahī kahte haiñ sab gul hai

diyā sāmān-e-gulshan ham ko hijr-e-rashk-e-gulshan ne

pareshānī hai sumbul naala bulbul dāġh-e-dil gul hai

likhī haiñ vasf yaañ tak nargis-e-maḳhmūr saaqī kī

hai ḳhāma gardan-e-mīnā sarīr-e-ḳhāma qulqul hai

baḌhā kar rabt kyūñkar kam na muñh dikhlā.e vo mah-rū

huā jab māh-e-kāmil din pe din us ko tanazzul hai

bahātī hai kahīñ bhī mauj-e-naqsh-e-boriyā ḳhas ko

na degā nā-tavāñ ko rañj jo sāhab tahammul hai

kahā us gul ne kul sāmān-e-gulshan meñ bhī raT.tā huuñ

jo āshiq hai mirā nāloñ se vo ham-chashm-e-bulbul hai

ḳhat-o-ruḳhsār-o-chashm-o-zulf dikhlā kar lagā kahne

ye raihāñ hai ye gul hai aur ye nargis hai ye sumbul hai

ḳhayāl-e-zulf-e-jānāñ meñ jo ro.uuñ to uge sumbul

'vazīr' aañsū mirā har ek goyā tuḳhm-e-sumbul hai

hamesha dil mein jo apne KHayal-e-zulf-o-kakul hai

to sine mein nafas har ek mauj-e-bu-e-sumbul hai

fasan hai saKHt-jaani meri tegh-e-naz-e-qatil ko

ki yan jitna hai ranj-e-naza utna wan taghaful hai

mujhi ko kuchh tu apne kuche mein aane nahin deta

wagarna ai sitam-ijad har gulshan mein bulbul hai

teri mina-e-gardan ki sifat ki hai jo ai saqi

meri aawaz ko kahte hain sab aawaz-e-qulqul hai

wahi dil hai bhara ho nashsha jis mein jam-e-wahdat ka

ki hai chhati ka patthar bazm mein shisha jo be mul hai

mare jo soz-e-gham se jal ke ho wo nek-nam aaKHir

charagh-e-murda ko aksar yahi kahte hain sab gul hai

diya saman-e-gulshan hum ko hijr-e-rashk-e-gulshan ne

pareshani hai sumbul nala bulbul dagh-e-dil gul hai

likhi hain wasf yan tak nargis-e-maKHmur saqi ki

hai KHama gardan-e-mina sarir-e-KHama qulqul hai

baDha kar rabt kyunkar kam na munh dikhlae wo mah-ru

hua jab mah-e-kaamil din pe din us ko tanazzul hai

bahati hai kahin bhi mauj-e-naqsh-e-boriya KHas ko

na dega na-tawan ko ranj jo sahab tahammul hai

kaha us gul ne kul saman-e-gulshan mein bhi raTta hun

jo aashiq hai mera nalon se wo ham-chashm-e-bulbul hai

KHat-o-ruKHsar-o-chashm-o-zulf dikhla kar laga kahne

ye raihan hai ye gul hai aur ye nargis hai ye sumbul hai

KHayal-e-zulf-e-jaanan mein jo roun to uge sumbul

'wazir' aansu mera har ek goya tuKHm-e-sumbul hai