hamesha mausam-e-gul hae tar nahin rahta

hamesha mausam-e-gul haa.e tar nahīñ rahtā

tamām umr koī ham-safar nahīñ rahtā

junūn-e-ishq meñ kyā terā ghar talāsh karūñ

mirī nigāh meñ ḳhud merā ghar nahīñ rahtā

ajiib rābta-e-husn-o-ishq hai jis meñ

ḳhayāl-e-sāya-e-dīvār-o-dar nahīñ rahtā

ye aur baat ki terī ḳhabar na ho mujh ko

magar maiñ ḳhud se kabhī be-ḳhabar nahīñ rahtā

batā rahā hai ye merā mushāhida mujh ko

rafāqatoñ kā shajar be-samar nahīñ rahtā

hamāre pesh-e-nazar aa.ine to rahte haiñ

magar nigāh meñ ā.īna-gar nahīñ rahtā

jo e.atibār kī had se guzar gayā 'aḳhtar'

kisī nazar meñ bhī vo mo'atabar nahīñ rahtā

hamesha mausam-e-gul hae tar nahin rahta

tamam umr koi ham-safar nahin rahta

junun-e-ishq mein kya tera ghar talash karun

meri nigah mein KHud mera ghar nahin rahta

ajib rabta-e-husn-o-ishq hai jis mein

KHayal-e-saya-e-diwar-o-dar nahin rahta

ye aur baat ki teri KHabar na ho mujh ko

magar main KHud se kabhi be-KHabar nahin rahta

bata raha hai ye mera mushahida mujh ko

rafaqaton ka shajar be-samar nahin rahta

hamare pesh-e-nazar aaine to rahte hain

magar nigah mein aaina-gar nahin rahta

jo eatibar ki had se guzar gaya 'aKHtar'

kisi nazar mein bhi wo mo'atabar nahin rahta