hans ke paimana diya zalim ne tarsane ke baad

hans ke paimāna diyā zālim ne tarsāne ke ba.ad

aaj nāzuk se lab-e-sāqī haiñ paimāne ke ba.ad

ḳhum-kadoñ meñ kuchh na hogā ek paimāne ke ba.ad

rah nahīñ saktī kabhī mai-lab tak aa jaane ke ba.ad

maiñ huuñ saaqī hai shab-e-ḳhalvat hai daur-e-jām hai

bose par bosa hai paimāna hai paimāne ke ba.ad

vaqt hai aisā thā ruḳhsat ho ga.ī un kī hayā

baat hī aisī thī khul khele vo sharmāne ke ba.ad

chheḌte haiñ pā ke mauqa un ke utre haar bhī

bante haiñ kyuuñ dil hamārā phuul murjhāne ke ba.ad

husn ho yā ishq hotī hai burī dil kī lagī

jal-bujhī ro ro ke āḳhir sham.a parvāne ke ba.ad

kah ke maiñ dil kī kahānī kis qadar khoyā gayā

haiñ fasānoñ par fasāne mere afsāne ke ba.ad

be-ḳhudī gum-gashtagī sukr-o-tahayyur mahviyat

kuchh maqāmāt aur bhī paḌte haiñ maiḳhāne ke ba.ad

duur tak shohrat hai us kī tuur kahte haiñ jise

be-charāġh ik jalva-gah hai mere vīrāne ke ba.ad

koī hiire kī kanī se kam na thā hañgām-e-zabt

kuchh hameñ piinā paḌe aañsū bhī ġham khāne ke ba.ad

ishq kī tārīḳh dohrā.ī zamāne ne zarūr

naam paayā qais ne bhī tere dīvāne ke ba.ad

shor hai rahnā qayāmat se bahut hī hoshiyār

un ke kūche se uThī hai Thokareñ khāne ke ba.ad

tab.a ho bhī to kahīñ dīvān merā ai 'riyāz'

dekhne kī chiiz hogā ye sanam-ḳhāne ke ba.ad

hans ke paimana diya zalim ne tarsane ke baad

aaj nazuk se lab-e-saqi hain paimane ke baad

KHum-kadon mein kuchh na hoga ek paimane ke baad

rah nahin sakti kabhi mai-lab tak aa jaane ke baad

main hun saqi hai shab-e-KHalwat hai daur-e-jam hai

bose par bosa hai paimana hai paimane ke baad

waqt hai aisa tha ruKHsat ho gai un ki haya

baat hi aisi thi khul khele wo sharmane ke baad

chheDte hain pa ke mauqa un ke utre haar bhi

bante hain kyun dil hamara phul murjhane ke baad

husn ho ya ishq hoti hai buri dil ki lagi

jal-bujhi ro ro ke aaKHir shama parwane ke baad

kah ke main dil ki kahani kis qadar khoya gaya

hain fasanon par fasane mere afsane ke baad

be-KHudi gum-gashtagi sukr-o-tahayyur mahwiyat

kuchh maqamat aur bhi paDte hain maiKHane ke baad

dur tak shohrat hai us ki tur kahte hain jise

be-charagh ek jalwa-gah hai mere virane ke baad

koi hire ki kani se kam na tha hangam-e-zabt

kuchh hamein pina paDe aansu bhi gham khane ke baad

ishq ki tariKH dohrai zamane ne zarur

nam paya qais ne bhi tere diwane ke baad

shor hai rahna qayamat se bahut hi hoshiyar

un ke kuche se uThi hai Thokaren khane ke baad

taba ho bhi to kahin diwan mera ai 'riyaz'

dekhne ki chiz hoga ye sanam-KHane ke baad