hans ke parda jo uThata to gulistan hota

hañs ke parda jo uThātā to gulistāñ hotā

aur hī rang-e-jahāñ tujh se numāyāñ hotā

hausla pūchh lo har zarre se vahshat kā mirī

nigah-e-hosh jo paḌtī to bayābāñ hotā

fasl-e-gul meñ jo kahīñ dāman-e-gardūñ kā hilāl

haath aatā to hamārā hī garebāñ hotā

aa.ine meñ vo nazar dekh rahe haiñ apnī

dil agar pech meñ hotā to ye mīzāñ hotā

mil ga.e ḳhaak meñ āñkhoñ se nikal kar nāhaq

ashk-e-pur-ḳhūñ ke liye aap kā dāmāñ hotā

nashtar-e-ishq-o-mohabbat ko nikālā maiñ ne

dil meñ rahtā to ye paivast-e-rag-e-jāñ hotā

dil kī mahrūmī-e-taqdīr kā sadma hai mujhe

ye jo gulshan na huā thā to bayābāñ hotā

maiñ agar daaġh bhī thā dāman-e-hastī ke liye

aap ke haath se miT jaane kā sāmāñ hotā

ālam-e-yās meñ sad-shukr ki aa.ī mujhe maut

is bure vaqt meñ thā kaun jo pursāñ hotā

pūjtā hai kisī kāfir ko 'vafā' kyoñ din-rāt

is se behtar to yahī thā ki musalmāñ hotā

hans ke parda jo uThata to gulistan hota

aur hi rang-e-jahan tujh se numayan hota

hausla puchh lo har zarre se wahshat ka meri

nigah-e-hosh jo paDti to bayaban hota

fasl-e-gul mein jo kahin daman-e-gardun ka hilal

hath aata to hamara hi gareban hota

aaine mein wo nazar dekh rahe hain apni

dil agar pech mein hota to ye mizan hota

mil gae KHak mein aankhon se nikal kar nahaq

ashk-e-pur-KHun ke liye aap ka daman hota

nashtar-e-ishq-o-mohabbat ko nikala main ne

dil mein rahta to ye paiwast-e-rag-e-jaan hota

dil ki mahrumi-e-taqdir ka sadma hai mujhe

ye jo gulshan na hua tha to bayaban hota

main agar dagh bhi tha daman-e-hasti ke liye

aap ke hath se miT jaane ka saman hota

aalam-e-yas mein sad-shukr ki aai mujhe maut

is bure waqt mein tha kaun jo pursan hota

pujta hai kisi kafir ko 'wafa' kyon din-raat

is se behtar to yahi tha ki musalman hota