hans len ye sitare bhi abhi raat ke upar

hañs leñ ye sitāre bhī abhī raat ke uupar

din chaḌhte hī aa jā.eñge auqāt ke uupar

ban jaa.e na vīrānī-e-dil apnī tamāshā

ham ḳhol chaḌhā lete haiñ ik zaat ke uupar

pahle to samajhte rahe har shai ko tamāshā

ab roke bhī kyā kījiye hālāt ke uupar

dekhā hai uchhaltī huī dastāroñ kā manzar

ik fitna-e-daurāñ se mulāqāt ke uupar

vā'iz kabhī maidān-e-amal meñ bhī qadam rakh

is silsila-e-kashf-o-karāmāt ke uupar

'ibrat to koī lene ko tayyār nahīñ hai

haañ jashn manāte haiñ mazārāt ke uupar

'az.har' na thī is baat meñ kuchh bhī to haqīqat

ik hashr sā barpā huā jis baat ke uupar

hans len ye sitare bhi abhi raat ke upar

din chaDhte hi aa jaenge auqat ke upar

ban jae na virani-e-dil apni tamasha

hum KHol chaDha lete hain ek zat ke upar

pahle to samajhte rahe har shai ko tamasha

ab roke bhi kya kijiye haalat ke upar

dekha hai uchhalti hui dastaron ka manzar

ek fitna-e-dauran se mulaqat ke upar

wa'iz kabhi maidan-e-amal mein bhi qadam rakh

is silsila-e-kashf-o-karamat ke upar

'ibrat to koi lene ko tayyar nahin hai

han jashn manate hain mazaraat ke upar

'azhar' na thi is baat mein kuchh bhi to haqiqat

ek hashr sa barpa hua jis baat ke upar