haq ki KHatir KHuda ki KHushi ke liye

haq kī ḳhātir ḳhudā kī ḳhushī ke liye

jiinā marnā hamārā usī ke liye

dil kisī ke liye sar kisī ke liye

bad-numā daaġh hai zindagī ke liye

dil to maa.il haiñ vābastagī ke liye

haath baḌhte nahīñ dostī ke liye

mar ke bhī log rahte haiñ zinda magar

ye sa'ādat nahīñ har kisī ke liye

merā qātil mirā apnā kirdār hai

kis ko ilzām duuñ ḳhud-kushī ke liye

bāl-o-par ke liye har bulandī nasheb

har zamīñ āsmāñ be-parī ke liye

gumrahī ke liye kam hazāroñ baras

ek pal bhī bahut āgahī ke liye

ye añdhere na hoñge charāġhoñ se kam

dil jalāo yahāñ raushnī ke liye

mai-kasho aao vā hai dar-e-mai-kada

shart koī nahīñ mai-kashī ke liye

she'r kahnā 'azīz' apne bas kā nahīñ

sirf lafzoñ kī bāzīgarī ke liye

haq ki KHatir KHuda ki KHushi ke liye

jina marna hamara usi ke liye

dil kisi ke liye sar kisi ke liye

bad-numa dagh hai zindagi ke liye

dil to mail hain wabastagi ke liye

hath baDhte nahin dosti ke liye

mar ke bhi log rahte hain zinda magar

ye sa'adat nahin har kisi ke liye

mera qatil mera apna kirdar hai

kis ko ilzam dun KHud-kushi ke liye

baal-o-par ke liye har bulandi nasheb

har zamin aasman be-pari ke liye

gumrahi ke liye kam hazaron baras

ek pal bhi bahut aagahi ke liye

ye andhere na honge charaghon se kam

dil jalao yahan raushni ke liye

mai-kasho aao wa hai dar-e-mai-kada

shart koi nahin mai-kashi ke liye

she'r kahna 'aziz' apne bas ka nahin

sirf lafzon ki bazigari ke liye