har-chand ki tha hijr mein andesha-e-jaan bhi

har-chand ki thā hijr meñ andesha-e-jāñ bhī

āḳhir ko to ham se hī uThā bār-e-girāñ bhī

ik gosha-e-dar rakkhā hai mahfūz hamārā

is vus.at-e-kaunain meñ ham jaa.eñ jahāñ bhī

mā'dūm bhī huuñ ahl-e-tamāshā kī nazar meñ

bikhrā hai har ik samt magar merā nishāñ bhī

kuchh kam na huā rizq ḳhudā tere gadā par

har chand ki galiyoñ meñ uThā shor-e-sagāñ bhī

kaam aatī hai aksar to yahī ḳhāna-badoshī

rakhne ko to ham shahr meñ rakhte haiñ makāñ bhī

us vaqt 'ajab hotā hai tarsīl kā 'ālam

lafzoñ ko taras jaate haiñ jab ahl-e-zabāñ bhī

har-chand ki tha hijr mein andesha-e-jaan bhi

aaKHir ko to hum se hi uTha bar-e-giran bhi

ek gosha-e-dar rakkha hai mahfuz hamara

is wusat-e-kaunain mein hum jaen jahan bhi

ma'dum bhi hun ahl-e-tamasha ki nazar mein

bikhra hai har ek samt magar mera nishan bhi

kuchh kam na hua rizq KHuda tere gada par

har chand ki galiyon mein uTha shor-e-sagan bhi

kaam aati hai aksar to yahi KHana-badoshi

rakhne ko to hum shahr mein rakhte hain makan bhi

us waqt 'ajab hota hai tarsil ka 'alam

lafzon ko taras jate hain jab ahl-e-zaban bhi